DILI (Timor Post)-Negosiante barak mak to’o agora kontinua faan iha dalan ninin sira iha kapital Dili inklui iha eis merkadu Komoro tanba espasu iha merkadu Manleuana no Taibesi atu akumula hotu negosiante la sufisiente.
Saturlina Vicente, nu’udar negosiante ne’ebé durante ne’e faan iha eis merkadu Komoro, hatete nia kontinua faan iha fatin refere tanba la hetan fatin iha merkadu rua ne’e.
“Ami atu faan sasán iha merkadu Manleuana no Taibesi maibé ami la hetan espasu atu ami faan iha ne’eba, antes ami ba ema seluk okupa tiha ona, entaun ami labele ba faan iha ne’ebá,” Saturlina hato’o ba Timor Post, iha eis merkadu Komoro, Tersa (05/10).
Aleinde ne’e, nia mos la satisfás ho fatin ne’ebé nia faan ba tanba konsidera kloot tanba alende uja ba faan, mós sai hela fatin.
Nia hatutan, durante situasaun pandemia Covid-19, produtu lokál ne’ebé nia faan, hanesan ai farina, fehuk midar, talas, hudi, ai-dilafuan no seluk-seluk tan ladún folin no balun sai dodok no estraga de’it, tanba ladún iha komprador.
“Ami nia oan sira mos eskola, osan atu selu eskola, osan ba han mos laiha no fatin ne’ebé hela la sufisiente atu faan sasán,” nia preokupa.
“Ha’u foti Kaebauk nia osan rihun ida atu lima ($1.500) hodi halo fila liman, maibé sasán ne’ebé ami faan la folin liu no rendimentu lor-loron nian ne’ebé ami hetan mos menus liu, dalaruma loron ida ami hetan de’it $5,” nia haktuir.
Nia hatutan tan, Kaebauk mós ezije ami fulan-fulan tenke hatama osan inan ho osan funan hamutuk atu Ida lima ($105), entaun hakarak ka lakohi tenke hatama fali osan inan ne’e.
“Durante situasaun pandemia Covid-19 seidauk tama, rendimentu lor-loron nian ne’ebé ami hetan mais ou menus loron ida bele to’o $60, maibé depois Covid-19 ema hotu-hotu tauk la mai kompras entaun ami nia sasán sira ne’e la folin”, nia hatete.
Iha parte seluk, negosiante Modesta Silveira, kontinua faan iha eis Pasar Senggol Bidau-Akadiru-Hun tanba laiha fatin seguru ba nia atu faan ninia produtu durante ne’e.
“Iha tinan 2020, ha’u faan sasan iha merkadu Taibesi maibé fatin ne’ebé ha’u faan ba la seguru mai ha’u. No mós iha merkadu laran laiha espasu mai hau hodi faan tanba ne’e hau mai faan fali iha merkadu Bidau ne’e,” Modesta hato’o ba Timor Post, Kinta (07/10).
Tanba ne’e, Modesta deside kontinua faan iha fatin refere mezmu ke faan iha dalan ninin, importante hetan netik osan hodi sustenta família.
Nia informa, durante pandemia Covid-19 sasan ne’ebé mak nia faan ladun folin tanba menus komprador. “Mais ou menus, loron ida ami hetan $9.00 deit, so iha loron Domingo mak komprador barak, ne’e ami hetan netik $ 15.00 hanesan ne’e,” nia katak.
Uluk, bainhira situasaun normal, nia dehan, loron ida bele hetan to’o $25.00 maibe agora ne’e, dalaruma sasan ne’ebé nia faan sai dodok estraga deit. (PJ7)
1,389 total views, 3 views today
Bele hare Video Seluk :
Subscribe to Timorpost
