DILI (Timor Post)—Ministériu Agrikultura no Peska (MAP) submete ona lista tratór ne’ebé atu hala’o leilaun hamutuk 56 ba Ministériu Finansas (MF), liuliu ba Diresaun Jerál Patrimóniu Estadu.
“Tratór ki’ik no boot hamutuk 500 ital, agora identifikadu di’ak para ministériu uza ne’e mak 294 tratór, no iha 56 mak tama ona ba lista leilaun,” Diretora Jerál MAP, Odete Maria do Céu, iha knar fatin Komoro, Tersa (05/10).
Nia dehan, tratór sira uza ideal ne’e tinan lima de’it. No tuir lei tratór aat sira ne’e tama ona iha patrimóniu estadu hodi halo leilaun.
Tanba ne’e, iha tinan 2008 no 2009, Odete afirma, MAP konsege sosa hand tratór no tratór boot hamutuk 500 resin no daudaun ne’e 294 mak ativu hela.
No tratór sira ne’ebé submete ba leilaun, nia dehan, mai husi munisípiu Ainaru tratór 4, Aileu 1, Bobonaru 9, Baukau 5, Kovalima 7, Dili 3, Ermera 2, Likisá 1, Lautem 5, Manatutu 6, Manufahi 5, Vikeke 6 no total hamutuk 56.
Portantu, kada tinan MAP mós aloka orsamentu hodi hala’o manutensaun ba tratór sira ne’e ho montante rihun $130 no manutensaun ba pesa sira ho montante rihun $250 hodi mantein funsionamentu.
Entretantu, iha sétimu governu konstitusionál, lansa tratór boot ho marka Kubota unidade 12. No manan na’in ba konkursu hodi sosa tratór ne’e husi kompañia lokál Ponte unipesoal Lda.
No kada tratór, ho folin $38 mill no total orsamentu hamutuk ba tratór unidade 12 ne’e, ho montante rihun $500.(jho)
814 total views, 3 views today
