DILI (timorpost.com)—Governu liuhosi reuniaun Konsellu Ministru (KM), aprova sidadaun na’in-lima hodi lidera Instituisaun TIMOR GAP, E.P. Timor Gás & Petróleu, E.P (TIMOR GAP), Murak Rai Timor, E.P, Autoridade Nasionál Petróleu, I.P. (ANP), Autoridade Nasionál Minerais, I.P. (ANM) no Institutu Jeosiénsias Timor-Leste, I. P. (IGTL).
“Nomeiasaun ba Rui Maria Alves Soares, lidera Instituisaun TIMOR GAP, E.P. Timor Gás & Petróleu, E.P (TIMOR GAP), José Manuel Gonçalves, Gualdino do Carmo da Silva, Rafael Danilson Magno de Araújo no Job Brites dos Santos, tau iha konsiderasaun ne’ebé rekoñese ona ba sira-nia idoneidade, integridade, formasaun akadémika no profisionál, esperiénsia ba kargu superiór sira, kapasidade téknika iha jestaun ba setór espesífiku petróleu, gás no rekursu mineral, koñesimentu polítika no estratéjika ne’ebé relasiona ho setór sira-ne’e, aleinde kompeténsia lideransa, kolaborasaun, pedagojia no motivasaun ekipa sira,” Timor Post sita iha Komunikadu, Kinta-Feira (14/09/2023).
Enkuantu, sidadaun ne’ebé assume kargu hanesan; Rui Maria Alves Soares, ba kargu Prezidente Konsellu Administrasaun nian maka Prezidente Komisaun Ezekutiva TIMOR GAP, E.P. Timor Gás & Petróleu, E.P (TIMOR GAP), ba mandatu ida ho durasaun tinan haat.
Hanesan empreza públika referénsia nian iha setór enerjétiku, TIMOR GAP hetan mandatu hodi jere investimentu sira Estadu nian iha setór petrolíferu no setór relevante sira, tuir polítika ne’ebé define ona husi Governu.
José Manuel Gonçalves, ba kargu Prezidente Konsellu Administrasaun no, ho injerénsia, Prezidente Komisaun Ezekutiva Murak Rai Timor, E.P, ba mandatu foun ida ho durasaun tinan haat.
Murak Rai Timor, EP, hanesan Empreza Públika referénsia nian iha setór mineiru Timor-Leste, Murak Rai Timor, EP hetan mandatu atu atua iha interese Estadu nian iha setór refere, liuliu realizasaun atividade Minerál sira, tuir polítika ne’ebé define ona husi Governu.
Gualdino do Carmo da Silva, ba kargu Prezidente Konsellu Diretivu Autoridade Nasionál Petróleu, I.P. (ANP), ba mandatu foun ida ho durasaun tinan haat.
ANP nu’udar institutu públiku ho atribuisaun sira atu atua hanesan entidade regulador setór no indústria sira petróleu, gás naturál no derivadu no setór relevante sira.
Rafael Danilson Magno de Araújo, ba kargu Prezidente Konsellu Diretivu Autoridade Nasionál Minerais, I.P. (ANM), ba mandatu tinan haat.
ANM hanesan institutu públiku ne’ebé ho ninia atribuisaun, hanesan instituisaun reguladora ba setór rekursu mineral ho kumprimentu ne’ebé rigorozu ba dispozisaun ne’ebé prevee ona iha Kódigu Mineiru, iha kualkér lejizlasaun ka regulamentasaun ezistente ka futura ne’ebé regula setór rekursu mineral.
Job Brites dos Santos, assume kargu Prezidente Konsellu Diretiva Institutu Jeosiénsias Timor-Leste, I. P. (IGTL sigla-Portugés), ba mandatu tinan haat.
IGTL nu’udár institutu públiku ida ho ninia misaun atu poténsia kriasaun no jestaun arkivu, produsaun, jestaun, armazenamentu no difuzaun informasaun jeolójika, inklui kona-ba rekursu petrolíferu, gás naturál no mineira, sai hanesan baze serbisu prosesaun, peskiza no esplorasaun rekursu mineral nasionál.
2,388 total views, 3 views today
