Vizita Korea Súl no Singapura (Parte II)
(timorpost.com)-Tais no kafé Timor nu’udar identidade ida Timor Leste nian. Produtu rua ne’e hanesan legadu husi jerasaun ba jerasaun no kontinua promove liu tan iha era ukun-an.
Tais nu’udar hena tradisionál ne’ebé hetan ona konsiderasaun hanesan produtu prinsipál ba kultura timoroan sira nian no hetan ona rekoñesimentu husi UNESCO (Organização Nações Unidas ba Educação, Ciência no Cultura).
Tanba ne’e, presiza duni timoroan sira kontinua promove no tenke proteze Tais nu’udar produtu hena ne’ebé orijinál tanba iha funsaun ba hatais iha atividade kultural maibé mós nu’udar dalan ba expresa identidade kultura husi kór oioin husi munisípiu ida-idak.
Nune’e mós kafé nu’udar produtu espesiál liu iha agrikultura Timor Leste.
Prezidente Repúblika José Ramos Horta durante hala’o vizita ba Korea Súl no Singapura promove ho di’ak tebes produtu Tais ho Kafé Timor.
Prezidente sempre hatais kazaku Tais iha forum sira hahú iha illa Jeju-Korea Súl no iha Singapura. Kada vizita entidade importante sira, Prezidente Repúblika hatais kazaku tais no sempre fó kafé ne’ebé prepara tiha husi kedas Dili.
Dala barak Prezidente Horta ba rai liur sempre hatais no oferese produtu lokal ba entidade sira, maibé iha eventu rua, Forum Jeju iha Korea-Súl no Shangri-La Dialogue iha Singapura, Prezidente Repúblika hatudu katak produtu Tais ho Kafé orizinál mak nu’udar maior fonte rendimentu ekonómiku no produtu prinsipal ba exportasaun.
Tais no kafé sai duni hanesan produtu karaterístiku ba mundu hahú kedas husi rezian ASEAN.
909 total views, 3 views today
