Eis Sekretáriu Zona Maubisse hakotu Iis, Meta Malik: Bossa La’ós FRETILIN

by -158 views

Timor Post (15/12/2020)—Eis Sekretáriu Zona Maukoli/Maubisse, Sub Rejiaun Ramelau Ainaro Konsellu Rejistensia Timorense, Alfredo Bossa hakotu iis iha Hospital Nacional Guido Valadares (HNGV), Dili, iha loron 14/12/2020.

Bossa nu’udar veteranu ne’ebé durante ne’e assumi responsabilidade nu’udar prezidente komisaun ba rekolla dadus veteranu no antigu kombatente husi Postu Administrativu Maubisse, Munisípiu Ainaro.

Molok lori ba Maubisse hodi hala’o serimónia funeral, família no kolega sira lori saudozu nia isin mate ba presta omenajen ikus iha Sede Nasionál Konsellu Veteranus iha Kaikoli, Dili.

Prezidente Konsellu Veteranu, Vidal de Jesus “Riak Leman” iha nia presta omenajen ikus fó nia rekoñesimentu boot ba Saudozu Bossa nia partisipasaun iha luta ba libertasaun nasionál.

Riak Leman fó sasin katak, iha momentu ne’eba nia rasik mak forma estrutura iha Reziaun Quatro no fó konfiansa ba Bossa tanba haree ba nia dedikasaun.

“Iha momentu ne’eba ha’u duni mak forma estrutura, nia servisu, nia bobar inimigu sai beik. Buat barak mak nia halo, mas ohin loron nia husik ona ita,” Riak Leman haktuir.

Iha oportunidade Ministru Asuntu Kombatente Libertasaun Nasionál (MAKLN), Júlio da Costa ‘Meta Malik‘, iha nia lia menon ikus subliña mós nia rekoñesimentu boot ba Saudozu Bossa nia partisipasaun iha luta ba libertasaun nasionál.

Meta Malik hatete, Bossa la’ós ema FRETILIN maibé nia hala’o servisu iha tempu rejisténsia liu ema FRETILIN sira iha Maubisse.

“Ho idade ne’ebé joven, Bossa la’ós ema FRETILIN, maibé nia halo liu fali FRETILIN iha Maubisse,” Meta Malik hatutan.

Nune’e, governante ne’e promete sei tau matan ba saudozu nia oan sira nia estudu.

“Estadu la taka matan ba estudu no nia oan sira nia moris. I fi’ar katak nia ba mós sei la taka matan ba ita hotu,” Meta Malik subliña. (cao)

No More Posts Available.

No more pages to load.