DILI (timorpost.com) – Ministériu Edukasaun (ME) daudaun ne’e halo ona preparasaun ba matéria Ezame Nasionál (EN) nian hamutuk 14 iha períodu tinan 2023.
“Daudaun ne’e ami elabora ona pontu matéria 14 tama iha faze elaborasaun hodi prepara ba ezame nasionál períodu tinan 2023 hahú iha loron 16 to’o 19 remata kontinua kedas ezame lokál,” Koordenadór Gabinete Avaliasaun Dezenvolvimentu Kurríkulu ME, João Maupelo, hateten ba Timor Post iha salaun Delta Nova, Kinta (14/09).
Enkuantu, matéria 7 mak tama iha ezame nasionál iha sekundária jerál, maibé matéria ida tama iha ezame lokál, tanba ne’e mak matéria ezame nasionál iha eskola ensinu báziku mak hanesan Matemátika, Siénsia Naturais, fízika, istória no matéria Tetun.
Portantu, eskola ensinu sekundária jerál matéria ezame nasionál hanesan portugés, ingles, matemátika, fízika, biolojia, kímika no tetun no siénsia teknolojia, maibé iha siénsia sosiais umanidade iha matéria 7 mak, portugés, inglés, ekonomia, métodu kuantitativu istória jeografia, sosiolojia ho lingua tetun.
Iha matéria relijiaun tama iha ezame lokál maski iha semana hirak ba kotuk parte igreja liuhusi sua eminénsia arsebispu Dom Virgílio do Carmo da Silva husu Ministériu Edukasaun atu tau matéria relijiaun Katólika tama iha ezame nasionál, maibé ME muda fali matéria relijiaun Katólika tama iha ezame lokál.
Entretantu, estudante ne’ebé atu partisipa iha ezame nasionál hamutuk 56.498, kompostu husi eskola ensinu báziku hamutuk 29.100, enkuantu ensinu jerál estudante finalista hamutuk 23.256 enkuantu eskola ensinu tékniku vokasionál estudante hamutuk 4142.
Enkuantu, kona-ba estudante ne’ebé tuir ezame ho valor estandarte direjente seidauk fó komentáriu kona-ba ida ne’e, tanba loron ezame nasionál seidauk to’o, maibé ME halo elaborasaun ba matéria ezame nasionál.
Maibé, nafatin kumpre oráriu edukasaun nian sei halo imprime ba matéria hotu-hotu hodi distribui iha loron 16 fulan Outubru ba eskola ida-idak iha territóriu laran tomak hodi realiza ezame nasionál ba períodu tinan 2023 nian.
Direjente ne’e haktuir, kurríkulu ne’e haktuir, kalendáriu ba ezame nasionál sei akontese iha loron 16 to’o 19 no kontinua ezame lokál iha fulan Outubru nia laran ne’e kalendáriu fiksu ona no hein de’it loron realiza ezame nasionál.
981 total views, 9 views today
