DILI (timorpost.com) – Orsamentu Jerál Estadu (OJE) ba tinan 2024, Ministériu Ensinu Superior Siénsia no Kultura (MESSK) tau prioridade hodi fó bolsu estudu ba dosente sira hodi kontinua estudu iha nivel mestradu no doutoramentu no hadi’a infraestrutura bazika.
“OJE iha tinan 2024, ami sei tau prioridade ba bolsu estudu ba dosente sira kontinua estudu iha nivel mestradu no doutoramentu no fasilita formasaun lingua Portugés ba dosente husi universitáriu no institutu privadu no públiku iha territóriu laran tomak hodi hasae sira nia koñesimentu no abilidade atu transforma siénsia ba estudante sira hodi garante kualidade edukasaun ensinu iha futuru,” Ministru Ensinu Superior Siénsia no Kultura, Jose Honório da Costa Pereira Jerónimo, hateten ba Timor Post hafoin remata reuniaun Konsellu Ministru iha Palasiu Governu, Kuarta (13/09).
Aleinde ne’e mós, forma komisaun organizadora hodi tau matan ba universidade privadu sira iha Timor-Leste hodi garante kualidade edukasaun iha futuru, tanba ne’e mak polítika nonu governu nian iha tinan lima nia laran mak hadi’a kualidade edukasaun iha Timor-Leste.
Tuir nia, liuhusi kria fasilidade adekuadu ba eskola ensinu superior no institutu privadu no públiku iha territóriu laran tomak hodi hadi’a infraestrutura bázika ne’ebé adekuadu.
Tanba ne’e mak polítika nonu governu iha tinan 2024-2028 mak fasilita formasaun ba dosente hodi tranzmite siénsia ba estudante sira bainhira remata estudu ho kualidade hodi kompete iha kampu de servisu no kompete ho nasaun seluk. Tanba Timor-Leste prepara tama ona ba ASEAN entaun presiza prepara rekursu umanu kualidade.
Nia dehan, orsamentu tinan oin foin mak diskute, maibé MESSK iha planu atu hadi’a fasilidade eskola ensinu superior sira, mas nafatin fasilita formasaun lingua Portugés ba dosente sira.
1,587 total views, 45 views today
