DILI (timorpost.com) – Governu liuhusi Ministériu Asuntu Parlamentár Komunikasaun Sosiál (MAPKOMS) durante ne’e halo peskiza no rezultadu hatudu katak sidadaun 37% asesu informasaun liuhosi Internet.
“Ita lansa relatóriu rezultadu peskiza hatudu katak sidadaun 37% kompostu hosi feto no mane mak asesu meius komunikasaun liuhusi internet hanesan WhatsApp, Twitter, Facebook no Messenger,” Ministru MAPKOMS, Francisco Jerónimo, hateten ba jornalista sira iha salaun Ministériu Transporte no Komunikasaun (MTK) Kaikoli, Sesta (09/06).
Governante ne’e dehan, peskiza ida ne’e hanesan faze preliminár hodi haree fila fali saida mak seidauk implementa no buka prepara di’ak liu tan hodi kompete iha futuru.
“Maibé agora daudaun aprezenta uluk relatóriu peskiza ba iha públiku hodi hatene ita nia komunidade asesu informasaun to’o iha ne’ebé, no nia porsentu hira ona no populasaun hira mak la asesu, tanba saida nia kauza husi ne’ebá,” governante ne’e esplika.
Atu nune’e, iha futuru bele prepara di’ak liután atu komunidade iha territóriu laran tomak bele asesu informasaun liuhusi rádiu, televizaun, media online no imprime hodi hatene informasaun husi rai laran no rai li’ur.
Ministru MAPKOMS ne’e dehan, maski mandatu hotu ona maibé husu nafatin ba governu foun tenke kontinua implementa programa refere hodi servi ba povu liuhusi informasaun atuál.
Tanba konstituisaun hatete katak, sidadaun hotu-hotu iha diretu asesu ba informasaun no sidadaun hotu-hotu iha diretu atu espresa sira nia hanoin, tanba ne’e mak governu se de’it mak mai ukun iha obrigasaun atu implementa programa ida ne’e.
“Ha’u mós sei hato’o ba ministru ida ne’ebé mak troka ha’u nia fatin favor tenke kontinua implementa programa ida ne’e, tanba durante ne’e ami kooperasaun di’ak ho ekipa ne’ebé halo peskiza kona ba sidadaun asesu ba informasaun,” nia hateten.
Iha fatin hanesan, Konselleiru Konsellu Imprensa (KI), Expedito Dias Ximenes, hatete nia parte apresia tebes ba MAPKOMS ho ekipa ne’ebé peskiza kona-ba rezultadu sidadaun 37% mak asesu meius komunikasaun liuhusi internet.
Tuir nia, liuhusi peskiza ida ne’e bele hatene loloos populasaun hirak mak asesu informasaun, tanba ne’e KI orgullu tebes tanba governu bele implementa programa ida ne’e.
“Tanba ne’e KI nafatin servisu hamutuk ho governu foun ne’ebé sei ukun atu nune’e bele halo peskiza barak liuliu hodi hatene loloos ita nia populasaun iha territóriu laran tomak, hira mak asesu ba informasaun. No liuhusi peskiza ida ne’e hatudu nia faktu no kredivel atu nune’e públiku bele hatene”, nia hakotu.
2,451 total views, 3 views today
