ADVERTISEMENT

Governu Hapara Profesór Voluntáriu Sein Koñesimentu MEJD

Augusto Sarmento - Edukasaun
  • Share

DILI—Governu liuhosi Konsellu Ministru, Kuarta (08/03), deside hapara imediata Profesór Voluntáriu, tanba laiha koñesimentu hosi Ministériu Edukasaun, Juventude no Desportu (MEJD).

            Ministru Prezidénsia Konsellu Ministru Fidelis Manuel Leite Magalhães, hatete kuandu rekrutamentu ba voluntáriu sira ne’ebé halo sein koñesimentu husi ministériu rasik, ne’e laiha responsabilidade legal Governu nian, no ministériu labele halo ida ne’e, eskola sira mós labele halo ida ne’e.

ADVERTISEMENT
SCROLL FILA BA NOTISIA


“Ministériu labele halo rekrutamentu arbiru de’it, Governu koko atu rezolve problema profesór voluntáriu, au-mezmu tempu husu para hapara kedas prosesu sira ba rekrutamentu voluntáriu, ne’ebé la’ós iha orientasaun no koordenasaun husi MEJD”, Fidelis informa iha Palásiu Governu.

Nia dehan, ida ne’e importante atu aviza ba públiku no ba ita boot sira atu fó sai ba públiku, tanba falta responsabilidade, entidade iha eskola balu halo rekrutamentu voluntáriu sira.

Depois, fó espetativa iha rekretadu sira-nia hanoin katak aban-bainrua sei sai kontratadu no sai permanente, ida ne’e sei labele kontinua, husi desizaun ida ohin Governu ida ne’e rezolve problema ne’ebé agora eziste.

“Maibé, ita hatene katak dalan ida ne’e sei naruk, mais importante mak sira ne’ebé oras ne’e rekrutadu balu mai husi komponente ida voluntáriu ne’e, balu mai husi komponente kontradu ne’e”, nia afirma.

Tanba ne’e mak Governu hakarak regulariza uluk sira kontratadu ne’e, ita husu para hapara prosesu sira rekrutamentu ba voluntáriu foun ne’ebé laiha koñesimentu husi MEJD rasik.

Tuir Fidelis katak, problema profesór voluntáriu ne’e kontinua husi Governu anterior, espera sei trava ho mekanizmu hirak ne’e para labele kontinua repete iha futuru.

Lee Mós :
ANAAA Finaliza Avaliasaun Programátiku

Tanba ne’e mak ohin Konsellu Ministru aprova ona projetu Dekretu-Lei ida, ne’ebé aprezenta husi Ministru Edukasaun, Juventude no Desportu, Armindo Maia, ba aliterasaun ba Dekretu-Lei no. 23/2010, loron 9 fulan-Dezembru, ne’ebé aprova Estatutu Karreira Edukadór sira ba Infánsia no ba Profesór Ensinu Báziku no Sekundáriu (Estatutu Karreira Dosente nian).

Alterasaun ida-ne’e hakarak atu atualiza Estatutu Karreira Dosente hodi akomoda evolusaun no dezafiu sistema edukativu daudaun ne’e nian iha Timor-Leste, atu fó kontinuidade ba dezenvolvimentu rekursu umanu nasionál, hodi promove kualifikasaun profesór sira nian no atu asegura katak hirak ne’e tenke koloka tuir nesesidade reál país nian.

Aleinde ne’e, Dekretu-Lei ida-ne’e determina estabelesimentu sistema rekrutamentu ida ba dosente foun sira liuhusi kriasaun Bolsa Kandidatura sira nian no kria rejime espesiál ida ingresu nian ba profisionál sira edukasaun nian ne’ebé dedika an ba ensinu no ne’ebé hetan ona abilitasaun mínima ne’ebé lei haruka hodi bele tama ba karreira.

Nune’e, alterasaun sira ba Estatutu Karreira Dosente ninia objetivu mak atu garante kualidade ensinu no profesór sira nian, hodi promove meiu sira atu halo selesaun, verifikasaun no kolokasaun husi rekursu sira, bazeia ba méritu no profisionalizmu, no ho adaptasaun ba nesesidade nasionál sira.

Ba indivídu kontratadu sira ne’ebé ezerse hela funsaun dosente durante tinan 2023, maibé laiha abilitasaun akadémika mínima ne’ebé presiza atu sai dosente, sei garante oportunidade atu hili kona-ba sira-nia futuru, hanesan rekoñesimentu ba sira-nia dedikasaun ba sistema edukasaun nasionál nian.

TLCE Husu MEJD Finaliza Molok Elpar

Organizasaun Naun Governmental Timor-Leste Coalition Education (TLCE) husu ba Ministériu Edukasaun, Juventude no Desportu (MEJD) atu bele finaliza lalais problema profesór Voluntáriu na’in-1.371 molok Eleisaun Parlamentár (Elpar).

Lee Mós :
UNPAZ Oferese Ekipamentu Servisu ba Dekanu, Vise Reitór no Pro-Reitór Sira

Tanba ne’e, Diretór ezekutivu TLCE, José Monteiro, hatete, TLCE husu ba Ministériu Edukasaun, atu finaliza lalais molok eleisaun no kontinua halo rekrutamentu ba profesór reklamante sira atuál.

“Maibé tuir Lei baze edukasaun hakerek tiha ona, katak ensinu báziku tenke mínimu baxarelatu, ensinu sekundária tenke Lisensiatura mak hanorin, di’ak liu enkoraja Ministériu Edukasaun atu halo kontratu no finaliza ba problema Profesór Voluntáriu sira iha tinan ida ne’e, molok eleisaun,” José hateten ba Timor Post iha nia knaar fatin Kaikoli, Kuarta (08/03).

Diretór ne’e mós husu ba reklamante sira ne’e, bainhira ninia maluk sira naran sai ka públika iha Jornál Repúblika atu bele kontratu ho Ministériu Edukasaun, entaun TLCE momentu ne’ebá fó hanoin kedas atu konsidera reklamante sira ne’e.

Tanba ne’e, TLCE kontinua enkoraja reklamante sira para bele aprezenta sira nia dadus ba iha Ministériu Edukasaun.

Nia hatutan, fundamentu mak saida? Ba dahuluk Ministériu Edukasaun tuir loloos sira la iha dadus kona-ba profesór Voluntáriu, tanba sira nunka rekoñese ezisténsia husi Profesór Voluntáriu.

Agora bainhira de faktu, ezisténsia profesór voluntáriu ne’e iha, tanba nesesidade eskola nian, entaun iha rekrutamentu profesór balu iha tinan 2021 ne’e sira hanoin, entaun fó uluk oportunidade ba profesór voluntáriu sira atu aplika, karik depois iha vaga balu tan mak foin halo, ida ne’e mak TLCE nia observasaun.

“Nune’e, ita presiza profesór reklamante sira atu bele aprezenta rasik sira nia dadus hanesan sira iha eskola ne’ebé, hanorin matéria saida no buat saida mak sira hasoru, maibé tanba dadus ba sira iha Ministériu Edukasaun laiha, reklamante sira tenke aprezenta dadus, atu nune’e Diretór eskola sira labele iha liu oportunidade barak para inventa lista profesór voluntáriu sira,” nia dehan.

Lee Mós :
Milena Pires Hatudu Simplisidade Iha Sentru Votasaun

José dehan, iha ona indísiu barak ne’ebé mak hatudu katak, profesór ne’ebé nunka voluntáriu, mais derrepente naran sai iha Jornál Repúblika, ne’e tanba invensaun husi Diretór eskola sira ka dirijente eskola sira, ne’e sira mak inventa.

Nune’e mak Ministériu Edukasaun haree ba ida ne’e katak, iha indísiu balu la di’ak, ne’e mak presiza reklamante hanesan, profesór sira ne’ebé mak sente katak hanorin duni, maibé naran la sai, sira sei mai hato’o direta ka aprezenta sira nia dadus.

“Ho ida ne’e mós iha tinan 2021 no 2022, Ministériu Edukasaun halo verifikasaun ba profesór sira, nune’e iha ekipa verifikasaun mós ha’u no ita bele mós dehan, sira nia serbisu la másimu ou ita deskonfia katak sira nia servisu laloos ba iha profesór voluntáriu sira”, nia dehan tan.

Antes ne’e, Ministériu Edukasaun Juventude no Desportu (MEJD) fó oportunidade ba profesór voluntáriu 1.371 ne’ebé seidauk hetan sira nia prosesu kontratu no hato’o sira nia reklamasaun hahú husi loron 03/03/2023 to’o loron 18/03/2023, durante loron 15, kuandu liu ona husi loron ne’e mak Ministériu Edukasaun la simu ona.

 1,344 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Governu Hapara Profesór Voluntáriu Sein Koñesim…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No