DILI (Timor Post) – Ministériu Edukasaun, Juventude no Desportu (MEJD), servisu hamutuk ho UN Women, asina akordu kona-ba programa igualdade jéneru no mós haree ba prevensaun violénsia bazeia ba jéneru no labarik feto sira.
Diretór Jerál Ministériu Edukasaun, Juventude no Desportu, Antoninho Pires, hatete selebra asina akordu ne’e kona-ba parseria ba empodera Komunidade iha eskola atu hatán ba violénsia bazeia ba jéneru tinan rua, hodi suporta implementasaun ne’ebé efetivu ba programa estrakurrikulár halo ligasaun ho respeitu no sesaun pozitivu ho inan-aman ba iha eskola 45 iha munisípiu 7 (Ermera, Bobonaro, Vikeke, Kovalima, Baukau, Dili no Oe-kusse) hanesan parte ida husi aprosimasaun eskola nian ba prevene violénsia bazeia ba jéneru.
“Ohin ita hatene katak objetivu husi asina akordu ida ne’e, espesialmente ba Ministériu Edukasaun ho ajénsia UN Women, atu haree liubá iha Programa ne’ebé Igualdade bazeia Jéneru nian, no mós haree ba prevensaun violénsia bazeia ba jéneru no labarik feto sira”, nia hateten iha Novo Turizmu, Kuarta (24/08).
Programa ne’e halo uluk, maibé ohin maka sira mensiona, depois maka Abranza ba Munisípiu sira, sei kontinua parseria ne’e hanesan kolaborasaun ida atu empodera manorin no komunidade eskola sira, liuhusi utiliza instrumentu Kurríkulu halo ligasaun ho respeitu ne’ebé dezenvolve husi UN Girls Education Initiative, atu prevene, hatán no responde efetivamente ba diskriminasaun jéneru no violénsia hasoru feto no labarik feto sira, liuhusi aprendizajen atu forma atitude no komportamentu ekuitativu ba estudante sira.
“MEJD no UN Women espera bele fortifika kolaborasaun di’ak hodi hametin no garantia igualdade ba ema hotu iha ambiente eskola nian. Garantia ema hotu-hotu nia direitu atu labele husik ema ida iha kotuk, partikularmente estudante sira atu sira nia ben-estar garantidu no sente seguru iha eskola,” nia hateten.
Iha fatin hanesan Xefe Edifísiu United Nations Women, Amy Nishtha Satyam, afirma objetivu asina akordu ida ne’e atu asegura parseiru ho MEJD liuliu haree ba labarik sira Mane no feto atu servisu haree ba aspetu hapara violénsia bazeia ba jéneru hasoru feto no labarik feto iha Ambiente Eskola nian. No hakarak haforsa liután servisu hamutuk ho MEJD maka ohin asina tan memorandu ida ne’e. No ida ne’e importante tebes, tanba servisu ba labarik no atu muda labarik sira-nia hanoin bainhira sira ki’ik, no bainhira hodi sira ba servisu iha uma, sira eskola no sai ba Komunidade.
Portantu Sesaun ne’e depois haluan tan ba eskola balu liuhusi ONU-Uniaun Europeia nia Inisiativa Spotlight iha tinan 2020-2023, ne’ebé sei inklui estudante 450, inan-aman 450 no manorin 30 iha Bobonaro, Ermera and Vikeke. Depois, kontinua ho ONU-KOICA nia Projetu hamutuk ba Igualdade iha tinan 2022-2024, ne’ebé sei inklui estudante 900 no inan-aman 900, manorin 150 iha Munisípiu Baukau, Kovalima, RAEOA, no Dili.
Nia dehan, UN Women harii esforsu ne’e atu dezenvolve kapasidade no rede sira hodi halo mudansa ba norma sosiál sira ne’ebé benefísiu de’it ema balu, utiliza aprosimasaun eskola tomak nian.
“UN Women hein katak liuhusi asina memorandum entedimentu ne’e, MEJD no UN Women bele iha kolaborasaun di’ak liu tan no iha kompromisu ne’ebé forte ba implementasaun programa prevensaun hotu iha eskola no asegura institusionalizasaun husi programa halo ligasaun ho respeitu liuhusi parseria ne’e, ita bele ajuda estudante, inan-aman, no manorin sira ba moris ida ne’ebé livre husi violénsia iha eskola, iha uma no iha sira-nia komunidade.” nia hakotu.
1,530 total views, 3 views today
