DILI (Timor Post)—Sekretáriu Estadu Komunikasaun Sosiál (SEKOMS), hala’o kampaña promove Internet saudavel liuhusi sensibilizasaun literasia dijitál ba dala-III iha Eskola Ensinou Tékniku Vokasionál (ETV) Bekora hodi kombate HOAX ka lia falsa.
“Objetivu husi sensibilizasaun dezmina informasaun kona-ba oinsá utiliza internet ho saudavel no kuidadu para ita hotu bele kontribui no kombate HOAX, ou lia falsu no situs negativu sira iha ita-nia rai”, dehan Sekretáriu Estadu Komunikasaun Sosiál, Mericio Juvinal Dos Reis “AKARA” iha Eskola Tékniku Vokasionál Bekora, Segunda (11/07).
Nia dehan, daudaun ne’e parte Estadu ho Governu preokupa kona-ba kondisaun atuál, tanba agora iha era dijitál buat hotu sempre iha pozitivu, maibé iha negativu depende ba ida uza, maibé liuhusi programa sensibilizasaun ida ne’e bele ajuda alunu sira oinsá uza media tuir dalan ne’ebe los hodi kria ambiente ne’ebe di’ak ba an no mós ba nasaun rasik.
“Tanba ohin loron ita asiste iha media, ema Utiliza media ba negativu barak liu, liuliu ba Estudante no joven sira ne’ebé utiliza hodi asesu informasaun pornografia, hatún malu, trata malu diskute malu mak makas iha media sosiál liuhusi Facebook, Google no selu-seluk tan. Entaun hanoin katak Edukasaun sívika ba sidadaun importante liuliu ba Estudante no joven sira iha rai laran”, Nia hatete.
Nia aprezenta, tuir peskiza ne’ebe iha katak Joven no Estudante maka uza media sosiál barak liuliu hanesan Facebook, Instagram no WhatsApp, Tiktok no You Tube.
“Entaun ita hanoin katak la bandu sira atu utiliza plataforma ba media sosiál no internet maibé oinsá ita dehan ba sira katak bainhira uza internet ne’e ho matenek no kuidadu”, nia fó hanoin.
Nune’e ohin nia esplika ba Estudante sira katak mínimu kada sidadaun liuliu ba Estudante no joven sira iha kapasidade hodi husu tuir bainhira informasaun ruma ka situs sai katak iha media sosiál tenke husu klaru ba fontes informasaun ne’e loos no kredivel ka lae, depois ida ne’e hotu sira iha kapasidade atu husu tan katak Informasaun sira ne’e Importante atu fó benefísiu iha Vida ka lae no ba sira nia família no ba sidadaun hotu ka lae.
“Karik sira haree kapasidade ba informasaun ne’ebe la klaru lalika haree, ida ne’e maka hamosu kombate HOAX no lia falsu salva ita-nia sidadaun husi informasaun iha ita-nia moris loro-loron”, nia esplika.
Aliened ne’e Diretór Eskola Ensinu Tékniku Vokasionál, Francisco Guterres, dehan ohin ETV grupu teknolojia Bekora hakarak aproveita oportunidade ida ne’e katak foin primeira vés SEKOMS ho ninia ekipa marka ninia prezensa iha Eskola ne’e atu halo Sosializasaun literasia dijitál.
Nune’e nu’udar meus ida atu oinsá Estudante sira prevene an husi informasaun falsu sira ne’ebe mosu liuhusi rede internet no mós prevene Estudante sira-nia an husi utilizasaun Rede internet ne’ebé la tuir dalan loos, liuliu iha pornografia no selu-seluk tan.
Tanba ne’e la’ós de’it Estudante sira hetan Siénsia ne’ebe ligadu ho sira nian ne’ebé iha, maibé Sensibiliza no informasaun sira ne’e bele aumenta tan sira+nia koñesimentu liuliu oinsá maka utilizasaun Rede internet hodi kombate lia falsu no lia bosok.
1,531 total views, 3 views today
