DILI (Timor Post)- Estudante Universidade da Paz (UNPAZ), Ojorio Lopes, Departamentu Direitu, Semester Lima (5), sai ezemplar di’ak ba juvendute Timoroan sira, tanba bele hatudu ona nia kriatividade durante nia aprende iha Prizaun laran.
“Kapasidade ne’ebe ha’u iha, hanesan suku roupa, pasta, no faru, no sel-seluk tan, ha’u aprende no tuir formasaun artigu tais iha Prizaun laran, durante tinan lima”, nia hateten ba Timor Post, iha Edifisiu Akait, bainhira loke atividade Feira, Domingu (10/07).
Nia dehan, husi abilidade hirak ne’ebé hetan iha Prizaun laran, ohin loron bele lori nia ba eskola, hanesan estudante universidade akadémika ida iha UNPAZ, ne’ebé bele kria servisu rasik na nia a’an, ba familia sira.
Tuir estudante UNPAZ nu’udar Eis Prizoneiru ne’e, duvida bo’ot ba a’an rasik, tanba ema barak mak iha kapasidade no abilidade, maibé lakoi atu promove no kontribui ba nia a’an, familia, no mós ba nasaun, Maibe loron kalan mak hakarak kria problema, no ejize oin-oin ba Governu, dehan loke kampu trabaillu.
“Ha’u fila husi sela ka prizaun, foin mak arepende ho idade juventude ne’ebé kria problema, hodi halakon ha’u-nia valor moris iha mundu nian, maibe ha’u nafatin esforsu”, Nia sublina
Nia dehan, husi esforsu sira ne’ebé hetan iha prizaun, ohin loron sai ezemplu ida ba familia no mós kolega estudante hot-hotu, katak hala’o problema ne’e sala ida, ne’ebé bele hakotu ita-nia abilidade, no kriatividade ba kapasidade Moris nian.
“Kria problema mak lori ha’u na Prizaun durante tinan 10 no aprende fali formasaun hanesan non-formál sira iha prizaun laran, maski ijoladu, maibé lakoi atu halakon mós esforsu, tanba ne’e ikus bele kria no produs, fali produtu sira ne’ebé iha”, Nia hateten.
Realidade konsege lori esdutante sira ne’ebé loron kalan, hanoin de’it mak problema, dezempregu, katak bainhira mak Governu loke empregu, maski hanesan eis Prizoneiru ida halibur sira hamutuk loke kampu traballu malu antes Governu kria.
Alende ne’e estudante Universidade Nasional Timor Loronsa’e, (UNTL), Januario Fernandes Freitas, Fakuldade Siensia Sociais (FCS), Departamentu Politikas Publikas (DPP), hatete kapasidade ne’ebé nia hetan, ohin loron lori sira kria rekursu no kampu traballu ba a’an rasik, hodi sustenta estudu nu’udar akademika ida.
Prosesu kapasitasaun ne’ebe hetan iha prizaun, liuhusi artigu tais nian, bele motiva sira hotu, hanesan estudante dezempregu sira, bele kria rasik kampu trabaillu liuhusi suku ropa, no tais, oinsá bele suku pasta, hodi hetan rendimentu uitoan atu bele redús ami-nia dependénsia ba família no mós ba Governu.
“Orgullu tebes ba kapasidade irmaun Ojorio nian, durante nia hetan iha prizaun, no ida ne’e sai hanesan ezemplar feitu ida ba ami no mós ba juventude no estudante hot-hotu, hodi moderniza fali nia esforsu tomak ba a’an rasik”, nia dehan
Realidade ohin hatudu bele fahe nia esperiensia, no sira bele servisu hamutuk ho nia, hodi lori artigu tais ne’e ba oin, maski neneik maibé fiar katak sei iha benefisiu di’ak ba sira no mós ba nasaun.
“Ami hanesan estudante husi UNPAZ no UNTL, liuhusi ami-nia kapasidade bele kria rasik kampu traballu ba a’an hodi sustenta ba ami-nia estudu, maibé husu ba Governu bele loke fatin no kondisaun ne’ebé permite ba ami atu hatudu mós ami-nia kapasidade sira ne’ebé hakarak kontribui ba nasaun no família Timoroan tomak”, nia hakotu.
2,317 total views, 3 views today
