DILI (Timor Post)— Fundasaun MAHON hanesan organizasaun sosiedade sivil ne’ebé promove mudansa ba komunidade espesialmente ba labarik no joven marjinalizadu, preokupa tebes ho kualidade edukasaun durante atake moras daet COVID-19 iha Timor Leste.
Diretór Organizasaun MAHON, Angelo Fernandes rekoñese difikuldade sira durante ne’e, maibé husu ba governu liuliu Ministériu Edukasaun Juventude no Desportu atu halo avaliasaun ba situasaun atuál no ho esforsu hotu garante kualidade ba estudante sira.
“Ha’u hanoin ministériu edukasaun presiza kontrola másimu no halo avaliasaun ba eskola sira liuliu professór sira atu hanorin hotu matéria ne’ebé mak importante. Ita labele dehan de’it situasaun ne’e, maibé tenke esforsu mós,” Diretór Angelo subliña ba Timor Post iha Bairru Pité, Domingu (08/08/2021).
Nia hatete, tinan rua ona eskola iha munisípiu Dili la’o ladún másimu ne’e afeta ba kualidade edukasaun, tanba hakarak prepara futuru ho kualidade governu tenke tau atensaun mós, labele hotu-hotu dehan de’it situasaun.
“Ita haree tinan rua ona eskola la’o ladún di’ak, ita agora labele ko’alia kualidade, tanba ita nia governu mós dehan de’it situasaun, ida ne’e ita labele ko’alia mós futuru nian,” nia subliña.
Tuir nia, agora iha munisípiu sira ezame segundu períodu remata ona, maibé munisípiu Dili seidauk dehan fó tempu ba estudante sira atu tuir prosesu aprendizajen lai más ita haree ministériu edukasaun tenke kontrola hodi halo avaliasaun eskola ne’e la’o di’ak ka lae.
“Ita haree dehan fó tempu ba estudante sira atu tuir prosesu aprendizajen, maibé loro-loron ita haree estudante sira to’o eskola tuku 8, tuku 9 mós sira sei la’o ba mai Estrada nakonu ida ne’e atu foku oinsá”, nia kestiona.
Angelo haktuir, ministériu edukasaun tenke aloka ona osan Konseisaun Eskolár ba eskola sira atu halo preparasaun labele aban atu ezame ona mak aloka ida ne’e fó terus ba eskola liuliu profesór sira atu prepara pontu ezame. (ono)
897 total views, 3 views today
Bele hare Video Seluk :