Diversifika Produtu Lokál Hodi Estabelese Loja Agrikultór

by -107 views
Agrikultura sira kuda modo repollu. (Foto Google)

DILI (Timor Post) —Governu liuhusi Ministériu Turizmu, Komérsiu no Indústria (MTKI) hamutuk ajensia Programa Dezenvolvimentu Nasoens Unidas (UNDP) no Programa Mundial Aihan (WFP) asina akordu ida (MoU) kona-ba diversifika podutu lokál hodi estabelese loja agrikultór.

Ministru Turizmu, Komérsiu no Indústria (MTKI), José Lucas do Carmo da Silva, hatete asina MoU ho UNDP ne’e atu diversifika produtu lokál no kontinua ho WFP hodi estabelese loja do agrikultór.

“Ita konsege asina MoU ho institutuisaun rua, rua ne’e hotu hola parte iha asuntu diversifikasaun ai han ho ekonomia, asina ho UNDP oinsá atu hola parte iha programa innovation challenge atu loke ba públiku, no halo ho WFP hodi implementa kona ba loja do povu,” informa José Lucas iha edifísiu MTKI Bebora, Kinta (26/08).

Portantu, nia dehan, tinan ne’e WFP sei loke loja lima ka neen iha munisípiu Dili no tinan tuir mai sei kontinua ba munisípiu seluk.

Enkuantu kona-ba programa UNDP nian, Ministru Lucas afirma, sira ne’ebé asesu mak kooperativa multi-sektorál, liuliu kooperativa produsaun iha area agrikultura, kriasaun animal, peska, diversifikasaun produtu industrializasaun, asosiasaun agrikultór no grupu produtór inklui asosiasaun médiu, pekena no mikro empreza.

Entretantu, Reprezentante UNDP iha Timor-Leste, Lagima Ontha, hatete parseria ho MTKI ne’e atu foka ba entrepreneur, liuliu fó oportunidade ba juventude atu sai autór ba dezenvolvimentu iha rai laran.

“Ajuda ita nia joven sira bele sai entrepreneur no iha programa ne’e rasik ninia alvu loloos ne’e atu foka liu ba juventude sira sai nu’udar autór ba dezenvolvimentu,” Lagima hatete.

Nia informa, UNDP hetan apoiu orsamentu husi MTKI hamutuk rihun $42-resin, no eventu ne’e sei organiza iha Dili. Programa ne’e sei foka liu ba iha juventude sira kreativu sira, liuliu iha produsaun lokál.

Nune’e mós, Reprezentante WFP iha Timor-Leste, Dageng Liu, hatete WFP hetan apoiu $100 mill husi MTKI hodi responde ba mal -nutrisaun iha Timor-Leste.

“Ami agradese tanba governu bele fó $100 mill atu fortifika hodi hasa’e foos lokál iha Timor-Leste, bele responde ba mal nutrisaun no defisiénsia nutrisaun iha Timor-Leste,” Dageng Liu agradese.

Entretantu, objetivu husi estabelesimentu Loja do Povu ne’e mak atu promove no produtu lokál liuhusi loja refere, dezenvolve ekonomia no komérsiu lokál no nasionál ne’ebé reziliente inkluzivu, diversifikadu no sustentanvel.

Tuir nia, loja do povu mak modelu loja integradu no inkluzivu ho baze iha munisípiu ne’ebé sai produtór, agrikultór no peskadór sira kontinua fornese produtu lokál ba loja ho folin ne’ebé competitive hodi mellora asesu ba merkadu.

Enkuantu na’in ba loja do povu, nia dehan, mak agrikultór, peskadór inklui produtór sira ka pekuária sira ne’ebé hamahan aan iha kooperativa agríkola ka organizasaun komunidade ka asosiativu ruma.

Loja do povu hanesan instrumentu organizativu prinsipál ba komersializasaun ba produtu lokál iha alternativu iha produtu komersiál importadu ho kualidade no presu competitive ba kliente no populasaun lokál.Ho apoiu ba dezenvolvimentu agríkola, armazenamentu, em pakotementu, embalajen, prosesamentu no marketing ba produtu agríkola ne’ebé agrikultór sira produs.

Disponibilizasaun bens esensiál atu atende sosiál ka membru no populasaun lokál sira ninian nesesidade bázika. Enkoraja agrikultór sira atu aumenta produsaun lokál tuir merkadu hodi hasae nesesidade no haburas dezenvolve ekonomia rural.

Portantu, produtu sira ne’ebé mak bele tama iha loja do povu, mak hanesan bens esensiál produtu lokál (foos lokál, batar, foremungu, forekeli, fore rai, koto no seluk tan), produtu ba fortifikasaun ai-han, ai-fuan no modo fresku sira (ortikultura), na’an lokál fresku, produtu peska, produtu artezanatu, produsaun mobiliáriu (Bambu), produsaun seluk tan.

Aleinde ne’e, iha mos kritériu sira mak hanesan prienxe formuláriu perfíl kooperativa, estatutu orgániku, lisensa husi SERVE, iha kapitál inisiu mínimu $5.000, inklui rai ka edifísiu.

Tenke iha konta bankária husi BNCTL no númeru IBAN, iha liña konsesaun ka distribuidór produtu sira, tenke iha mós rejistu emprezariál, iha planu ba negósiu, hatudu viabilidade ekonómiku, finanseira, organizativu no ambiente kultura.

Deklarasaun prontidaun hodi operasionaliza loja do povu no koopera ho governu liuliu Ministériu Turizmu, Komérsiu no Indústria (MTKI).(jho)

No More Posts Available.

No more pages to load.