Diretór SSM Aileu husu Ministériu Saúde nia Atensaun

by -540 views
Imajen ne'e hatudu pessoal saude halo atendimentu ba pasiente sira. Foto Espesial

AILEU (Timor Post)—Diretór  Servisu Saúde Munisípiu Aileu Júlio dos Santos, husu Ministériu Saúde (MS) aumenta tan pesoál saúde ba sentru saúde Aileu Vila, Remexio, Laulara no sentru saúde Lekidoe, ne’ebé mak menus pesoál saúde (PS).

“Servisu saúde munisipál Aileu iha ninia sentru saúde haat no postu saúde 12 no postu tratamentu, ita nia fasilidade no pesoál saúde ita sente seidauk sufisiente atu atende ita nia komunidade ne’ebé sei hakilar ba atendimentu saúde nian, tanba ne’e husu ba Ministériu saúde aumenta tan pesoál saúde”, Júlio dos Santos, ba Timor Post iha serimónia Lasamentu izolamentu no mini laboratóriu iha Aileu Vila, Kuarta (22/09).

Nia hatete, ho nune’e servisu saúde munisipál kria planu hamutuk ho administradór munisípiu hodi buka prioridade atu konstrui postu saúde ba iha suku no aldeia.

Profisionál saúde sira iha Aileu mai ho rejime rua kompostu rejime espesiál no rejime jerál, rejime espesiál hanesan funsionáriu permanente 180, rejime jerál 35 no iha mós kontratadu ne’ebé mai hosi rejime rua ne’ebé servisu ba iha area Tuberculosis, Malaria, HIV/SIDA, inklui tékniku balun sei kontratu mai hosi administrasaun munisípiu.

“Haree ba kondisaun rill pesoál saúde iha Aileu seidauk sufisiente, maibé ita nafatin levanta mapeamentu sira ba iha rekursu umanu nasionál, atu nune’e haree ninia kontinuasaun ba Ministra Saúde hodi haree no tetu”, nia promete.

Hatán ba preokupasaun hirak ne’e Ministra Saúde Odete Maria Freitas Belo, rekoñese fasilidade ne’ebé seidauk sufisiente, hanesan Ministra Saúde liuhosi Ministériu saúde ho esforsu oinsá hodi rezolve problema hirak ne’e.

“Hanesan ministra saúde ha’u hatene sistema saúde ne’ebé sei fraku entermus konstrusaun no rekursu umanu, ida ne’e ita sei fraku tebes, fraku la’ós signifika ami la hatene halo servisu lae”, Odete rekoñese.

Ho ninia kuantidade númeru konstrusaun ne’ebé la sufisiente no númeru ekipamentu, pesoál saúde sei menus.

“Ezemplu ita atu ko’alia kona-ba médiku hosi tinan 2020 to’o 2021 ita iha médiku 39, ita seidauk iha graduasaun foun ho númeru médiku ne’ebé iha, ami ministériu saúde hadau malu atu hetan númeru 39 ne’e hodi halo distribuisaun no koloka ba iha munisípiu 12, maibé iha tempu hanesan ajénsia sira mós halo hotu kontratu ba médiku sira, entaun médiku hirak ne’e ita atu fahe oinsá”, hatete nia. (res)

No More Posts Available.

No more pages to load.