Diplomata Timoroan Sente Lakon ho Eis Prezidente Jorge Sampaio Nia Mate

by -501 views
Jorge Sampaio

DILI (Timor Post)—Eis Prezidente Portugal, Jorge Sampaio hakotu iis ho idade 81, iha loron Sesta (10/09/2021).

Fó sai iha noticiasaominuto.com, Jorge Sampaio hakotu iis iha Ospital Santa Cruz, Lisboa-Portugal, tanba sofre moras respiratóriu.

Relaiona ho notísia triste ne’e, diplomata senior Timoroan José Luis Guterres sente lakon boot ida ba Portugal nune’e mos Timor Leste tanba Jorge Sampaio nia kontribuisaun boot tebes ba luta libertasaun Timor Leste nian.

José Luis haktuir, Jorge Sampaio nu’udar kolega di’ak i hanesan maun-alin ho Timor ne’ebé antes nia sai Líder Partidu Sosialista no sai Prezidente Portugal, nia fó ona apoiu ba auto determinasaun ba Timor.

“Ita bele dehan katak, Señor Jorge Sampaio ema ida ke ita konsidera hanesan amigo e irmão ne’ebé iha tempu difisil sempre hamutuk ho ita,” José Luis ba Timor Post via telefone.

José Luis hatutan, iha oportunidade barak maka delegasaun husi Timor hasoru malu ho Jorge Sampaio iha Portugal no iha Nasoens Unidas, nia sempre fó inspirasaun no korajen ba timoroan sira atu kontinua nafatin luta ba libertasaun nasionál.

Jorge Sampio hola parte hanesan líder iha Partidu Sosialista (PS), nia hola parte hanesan internasional sosialista bainhira iha reuniaun sira ne’ebé timoroan sira mos partisipa iha momentu ne’eba, nia sempre fó solidariedade maka’as no ko’alia ho líder sira seluk sosialista nian iha Europa hodi fó apoiu ba Timor.

“Ho esforsu sira ne’e hotu, ho lúta ita nian iha rai laran ho lideransa Maun Boot Xanana Gusmão ita konsege hetan independénsia,” José Luis subliña.

Nia hatutan tan, depoizde Timor Leste hetan ona independénsia, demokrasia ne’ebé Timor Leste hetan mós kontribuisaun husi Jorge Sampaio no líder sira seluk iha Portugal.

“Nebe, momentu nia mate, ita sente lakon i fó profunda kondolénsia ba família, ba estadu Portugues. Ita hanesan Timor sente hanesan amigo boot ida maka husik ita,” tenik diplomata senior. (cao)

No More Posts Available.

No more pages to load.