Difisil Autópsia Ema Mate Deskonfia Ho Vasina

by -259 views
Xefe Diresaun Departamentu Forensic iha Hospital Nasionál Guido Valadares (HNGV), Nilton Tilman. Foto: TP

(Reportajen Olga Soares / Editór Marcos Fernandes)

DILI (Timor Post) Xefe Diresaun Departamentu Forensic iha Hospital Nasionál Guido Valadares (HNGV), Nilton Tilman, hatete autópsia ba ema mate deskonfia mate ho vasina bele autoriza, maibé presiza iha lei ida sai baze fundamental. Maibé difisil autópsia kuandu ema mate deskonfia ho vasina.

“Ita kultura Timor dala barak ema la komprende saida mak autópsia no ema hakarak hatene ninia rezultadu loloos, maibé hakarak hateten autópsia nia rezultadu sai mai ho forma surat tahan, la’ós sai hanesan ema opera hodi hateten katak, autópsia hetan tumor ida, ne’e la’ós. Tanba ne’e ita nia komunidade, sira simu ka lae, tanba ne’e difisil autópsia ema mate ho vasina”, Nilton ba jornalista iha HNGV, Segunda (28/06).

Nilton dehan, autópsia ba ema mate deskonfia mate ho vasina bele halo autópsia, tenke ho kondisaun, presiza aterra lei, reforsa rekursu, ekipamentu, maibé buat sira ne’e hotu atu realiza iha tempu badak ne’e la fasil.

“Tanba ne’e di’ak liu ita sees-an hosi opsaun autópsia, ita komunika koopera ho ita nia komunidade ne’e importante, maibé kuandu ita dada malu ba autópsia ikus mai nia rezultadu mosu mai ho surat tahan ida, la’ós ho autópsia ita lori sai ho buat ne’ebé ita opera hetan buat ruma iha laran atu hatudu ne’e lae”, nia esplika.

Médiku ne’e sujere ba ema hotu katak kazu ruma mate ho deskonfia vasina ho Covid-19 di’ak liu labele dada malu ba autópsia. Tanba la garante atu rezolve problema.

“Razaun fundamental ba iha forensic niak katak, difisil atu halo autópsia, ba ema mate ho vasina. Tanba HNGV sei menus rekursu, fasilidade seguransa ba pesoál saúde halo autópsia”, Nilton argumenta.

Médiku ne’e mós espresa ho preokupasaun katak, HNGV fatin ida ikus liu atu próteze. Tanba iha ne’ebá akumula ema moras ho vulneravel barak. Tanba ne’e sei halo autópsia ba kazu hirak ne’e ho kondisaun ida agora, ho limitasaun entaun sei prejudika.

Nia esplika, ema simu vasina maibé nia efeitu ki’ik, maibé nia risku iha pembekuan darah, maibé hanesan hateten ona katak hosi ema rihun simu vasina, maibé iha ema ida de’it mak atu hetan risku.

Tuir nia bainhira ema la simu vasina imajina took saida mak akontese, maibé vasina trava ona buat barak no vasina ida fó ba ema hotu simu ne’e espesífiku ba Covid-19, maibé ho variasaun foun ne’ebé mosu mai vasina la konsege kobre.

“Tanba ne’e faze fundamental ne’ebé ha’u sempre fó énfaze ba ida ne’e simple mak uza máskara, fase liman, distánsia sosiál no ita tenke agradese, tanba vasina mai tulun no hatún ona naha todan, ita haree pasiente baixa iha Vera Cruz, maioria munisípiu, enkuantu hosi Dili númeru ki’ik, tanba populasaun iha Dili maioria sira ona vasina”, nia subliña.

Kuandu vasina alastra to’o iha munisípiu, signifika problema moras Covid-19 iha rai laran bele redús ona. (Lee Notísia Seluk iha Jornal Diáriu Timor Post)

No More Posts Available.

No more pages to load.