Dezobediênsia, Polísia Kaptura Sidadaun hamutuk 233 iha Dili

by -243 views
Imajen ne’e hatudu polísia halo hela identifikasaun ba sidadaun sira iha Kuartel Jeral PNTL, Kaikoli, Dili

Timor Post (14/03/2021)—Komandu Polísia Munisípiu Dili halo operasaun iha sidade Dili ohin dader konsege kaptura sidadaun hamutuk 233 tanba dezobediênsia ka kontra regra estadu emerjénsia no serka sanitária.

Sidadaun hirak ne’e polísia kaptura iha fatin la hanesan iha sidade Dili, barak liu sira ne’ebe halo jinastika no lori ba kuartel jerál PNTL, Kaikoli, DIli hodi halo prosesu identifikasaun.

Komandante Daruak Polísia Munisípiu Dili, Superintendente Euclides Belo ba Timor Post hatete, regra sira hatúr katak bandu sidadaun hotu halo movimentasaun sira exeptu ba hola aihan, ba ospital no situasaun emerjénsia sira, no tenke uza maskara.

“Ami foti sira iha Dili laran, balu iha Palásiu Governu oin, Largo Lesidere, Pantai Kelapa, no fatin seluk tanba sira dezobidensia ba regra,” Euclides subliña.

Nia dehan, sidadaun sira ne’e polísia lori ba kuartel hodi halo identifikasaun no tetu ba liberta ka kumpri tama sela.

Euclides apela ba sidadaun hotu atu tur hakmatek iha uma hodi prevene moras daet COVID-19 no fo oportunidade ba ekipa saude no seguransa sira hala’o servisu ho di’ak liu.

Entretantu Governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).

Hafoin reuniaun Konsellu Ministru, Ministru Prezidénsia Konsellu Ministru (MPKL) Fidelis Leite Magalhães haktuir, desizaun ne’e governu foti tanba transmisaun lokal moras daet COVID-19 iha Dili laran.

Fidelis dehan, tanba tuir regra serka sanitaria durasaun ba loron hitu maka depois de prazu ida ne’e maka governu sei halo fali desizaun bazeia ba dezenvolvimentu situasaun atuál iha rai laran liuliu iha munisípiu Dili.

Durante serka sanitaria, Fidelis subliña, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk,  aihan no seguransa.

“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete.

Nia hatutan, ba sira ne’ebé husi munisípiu seluk no rejidente iha Dili,  sira bele tama mai Dili maibé tenke relata ba SIJK no kumpri konfinamentu obrigatóriu.

Konsellu Ministru mós deside atu labele halo atividade kulturais, reliziosa no atividade sira ne’ebé halibur ema barak durante periodu serka sanitaria iha Dili.

Fidelis dehan, konsellu ministru mós bandu atu komunidade sira sai husi um aba fatin públiku sira bainhira laiha nesesidade.

“A não ser nesesidade urjente sira hanesan ba hola aihan ou hola eletrisidade ou hola medikamentu sira, maibé la’o iha númeru kiik no bainhira pesoal seguransa sira halo para karik tenke justifika,” Fidelis salienta.

Atividade eskola no merkadu sira sei hatúr tuir despaixu husi parte relevante  sira sei fó sai.

“Konklui katak atvidade hotu sei paradu durante loron hitu ne’e nia laran,” Fidelis subliña.

Jornalista Olga Soares

Editór Noémio Falcão

No More Posts Available.

No more pages to load.