Dezastre Naturál iha Alas, Mota Laklo Sobu Uma Kain-4

husi -75 views

Timor Post (16/03/2021)—Udan boot tau maka’as iha mota Laklo nia uluk provoka dezastre naturál akontese iha Postu Administrativu Alas, Munisípiu Manufahi. Uma kain-haat mak hetan estragus inklui toos ne’ebé nakonu hela ho produtu lokal.

Akontesimentu ne’e ohin maizumenus tuku tolu lorokraik.

Administrador Postu Administrativu Alas, Leopoldo Bareto ba Timor Post informa, komunidade aldeia Kakauoan, Suku Mahakidan maka sofre ba dezastre naturál ne’e.

“Agora dadaun ha’u mós atu tun no sa’e lá di’ak tanba mota boot no ohin kalan ha’u hamutuk hela ho komunidade sira iha aldeia Kakauoan,” Administrador Leopoldo via telefone ba Timor Post.

Ekipa husi Institutu Jestaun Ekipamentus (IGE sigla Portugués) husi Vikeke-Dilor to’o ona iha fatin akontesimentu hodi normaliza fali mota dalan hodi labele halai ba komunidade nia uma ho toos sira.

Jornalista Luis Casimiro Lopes

Editór Noémio Falcão