Dezastre Iha Manufahi Hamate Ema Nain Rua

husi -511 views
Korpu Bombeiros koa ai ne'ebé hanehan kareta Grand Max hodi hamate ema nain 2

(Reportájem Luis Casimiro Lopes/Editor Suzana Cardoso)

MANUFAHI (Timor Post)-Ema nain rua lakon vida kauza hosi dezastre naturais, anin boot durante minute 30 iha Kinta, (01/04/2021) dader.

Sasin ajudante kareta (konjak-Indo) grand Max, Serafin Menezes konta tuir akontesementu ne’e ba korespondente Timor Post katak, kareta grand max ho sapa matrikula 37-939 TL halai husi diresaun Postu Administrativu Same, Munisipiu Manufahi atu ba Suku Likibau-Ulu, Postu administrativu Maubisse.

“Kareta grand max ne’e too iha estrada Ermeti, Suku Letefoho, derepente ai samtuku boot ida iha foho leten Estrada sorin karuk monu tu’un hanehan kondutor ho patraun ninia alin ne’ebé tu’ur iha kareta oin.”

Hatutan Serafin ne’ebé salva husi dezastre ne’e katak, kareta grand max sai husi patraun nia uma Simpang tiga iha Suku Daisua, Postu Administrativu Same maizu menus tuku 05:00 dadersan udan laiha.

Komunidade hobur  hodi hakarak hare diretamente akontesementu, Foto Timor Post/Luis Casimiro Lopes

Maibé katak Serafin, too iha estrada diresaun Suku Letefoho liga ba Estrada Suku Holarua udan tun akompaña kedas ho anin boot. Too iha Estrada Ermeti partensi Estrada Suku Letefoho nian, derepente ai samtuku tarutu iha foho leten. Monu tun baku kareta nia kapong maka hanehan kondutor ho patraun nia alin ne’ebé tur iha kareta oin, mate fatin.

“Ami nain haat mak iha kareta laran. Hau (Serafin-Red) ho ferik iha kareta kotuk. Kondutor ho patraun nia alin maka tur iha kareta oin,” haktuir Serafin ho lian nakdedar.

Iha parte seluk tuir observasaun Timor post nota katak, hafoin akontesementu ne’e, liu oras balun ekipa korpu bombeirus Munisipíu Manufahi lori sensor koa ai samtuku ne’ebé hanehan kareta ne’e maka foin hasai mate isin.

Antes intrega ba familia hodi halo serimonia funebre, korpu bombeiros transporta mate isin ba sentru saude Munisipíu Manufahi hafoin pesoal saude sira maka entrega ba familia.

Iha akontesementu ne’e, aliende hetan atendementu hosi korpu bomeirus. Hetan mós atendementu hosi parte EDTL, ekipa Polisia Nasionál Timor-Leste (PNTL) no Sentru Saúde Munisipiu Manufahi. Komunidade kuaze besik atus ida resin mak hobur iha ne’eba.

Hafoin evakua tiha mate isin, estrada taka besik oras haat nia laran, hodi fo tulun ba korpu bombierus sira tesi ai no dada ses kareta grand max ne’ebé ai hanehan hosi estrada públiku ne’e.

“Ekipa bombeirus rona informasaun akontesementu hosi PNTL iha tuku Ualu dadersan, mai halo kedas atuasaun,” katak Komandante korpu bombeirus Munisipiu Manufahi, Bruno da Costa hodi hatutan.

Antes ne’e ekipa jestaun risku dezastre anunsia ona ba públiku katak sei akontese udan no anin boot iha parte tasi mane hahu husi loron 28 Marsu to’o loron 3 Fulan Abril tinan ne’e. Antesipa akontesementu hanesan ne’e, bombeirus sei koordena ho administrasaun Munisipíu Manufahi hodi tesi hotu ai iha estrada ibun.

To’o notisia ne’e hatun jornalista Timor Post seidauk konfirma konaba identidade matebian nain rua nian ne’ebé transporta ona ho kareta Funebre iha tuku 11:00 dader ba hela fatin iha Likibau.(***)