Dezastre Bukoli, Tino Carles Hakotu Iis iha HoREX

by -2.128 views
Mediku sira halo atendimentu ba pasiente sira iha HoReX. Foto TP: Caetano Guterres

Baukau (Timor Post)—Dezastre karreta ho marka Carry ho xapa matríkula 38-742 baku fila iha área Suku Bukoli, Munisípiu Baukau, rejulta vítima ho naran Tino Carles ho idade tinan 18 hakotu iis.

Tino Carles hetan kanek todan bainhira karreta baku fila no konsege evakua ba Hospital Referal Claudino Ximenes (HoReX) maibé la konsege salva.

Tuir kronolojia, karreta Carry dirasaun Postu Iliomar-Munisípiu Lautem ba Dili iha segunda kalan, no baku fila maizumenus iha tuku 3 madrugada tanba deskonfia kondutor lanu no dukur i hala’i ho velosidade maka’as maka xoke iha besi protesaun iha estrada ninin no baku fila ba rai naruk iha área Suku Bukoli.

Total vítima husi dezastre ne’e hamutuk ema na’in-15 inklui matebian Tino.

“Pasiente feto ida idade 23 ruzuk ona ba HNGV. Iha tan alin mane ida ho naran Salvador da Silva 18 anos mak oras ne’e dadauk hetan mos kanek grave,” Xefe Departementu Kontrolu Kualidade no Komunikasaun Sosiál ba Timor Post, Tersa (11/01/2022) iha Sala Emerjénsia HoReX.

Iha tempu hanesan família matebian Tereza da Costa Carceres Belo senti tristi ho Tinu Carles nia mate tanba lakon alin mane di’ak ida ne’ebé durante ne’e badinas halo servisu iha uma laran maibé derepenti hetan dezastre to’o hakotu iis.

Adjuntu PNTL Munisípiu Baukau, Superintendente Asistente José Casimiro hatete, hafoin  akontesimentu polísia tránzitu munisípiu Baukau to’o kedas fatin hodi asegura vítima sira no akompaña evakuasaun ba ospitál.

Médiku sala emerjénsia HoREX Baukau, João Osorio da Costa Ribeiro hatete, pasiente na’in-haat ne’ebé hetan kanek grave iha parte kelen, kakorok, kabun, dadaun ne’e médiku sira halo ona atendementu enkuantu pasiente nain ida seluk obrigadu tama  sala operasaun tamba  hetan pankada maka’as iha parte  laran.

Pasajerus Felisberto da Silva hosi postu administrativu Ilomar munisípiu Lautem haktuir, derepente kareta xoke besi protesaun no kareta baku fila.

Motorista ne’ebé kondus karreta marka Carry ho inisial VFF idade rua nolu resin lima dadaun ne’e tuir hela prosesu investigasaun hodi hatene motivu hosi akontesementu ne’e.

Tuir planu matebian Tino Carles família sira sei transporta ba haloot iha nia moris fatin Iliomar. (gut)

No More Posts Available.

No more pages to load.