Dezafiun Boot ba Prezidente Repúblika Foun: Rejolve Problema Violasaun K-RDTL

by -1.583 views
Imajen ne’e hatudu José Manuel Ramos Horta ho Kayrala Xanana Gusmão iha eventu ida iha rai laran. Foto antigu

Jornalista Jaime Pires / Editór Noémio Falcão

Dili (Timor Post)—Premiadu Nobel da Paz José Manuél Ramos-Horta rekoñese dezafiu boot ba Prezidente Repúblika 2022-2027 maka violasaun ba Konstituisau Repúblika Demokrátiku Timor Leste (KRDTL), ne’ebé akontese iha tinan rua liu ba.

Ramos Horta hatete, pasu dahuluk agora atu halo eleisaun prezidensiál depois hakat ba eleisaun parlamentár no bainhira inklui sirkuntansia atu halo eleisaun parlamentár ne’e oinsá.

“Oinsá ita retifika problema ita define tiha ona durante tinan rua nia laran voiolasaun konstituisaun, oinsá atu retifika ida ne’e,” Ramos subliña ba Jornalista sira hafoin fó posse ba estrutura movimentu Junta Forsa Polítika-Aliadu Defende Direitu Demokrátiku (JFP-ADDD) alias XA-RA (Xanana-Ramos), ne’ebé fó apoiu ba nia kandidatura hodi kompete iha Eleisaun Prezidensiál periodu 2022-2027.

Ramos Horta foti kestaun ne’e no kontinua tau preokupasaun ba lejitimidade Prezidente Parlamentu Nasionál Aniceto Guterres.

“Se mak fó posse ba prezidete foun, tuir ita nia konstituisaun ita hatene se mak fó posse, no ema ne’ebé mak atu fó pose ne’e iha lejitimidade ka la’e, tanba ita rona tinan rua nia laran la’ós lejitimu,” Diplomata Senior ne’e hatete.

Tanba ne’e, Ramos Horta espera kandidatu hotu ne’ebé sei kompete iha eleisaun prezidensiál tenke tetu dezafiu sira ne’e hodi rezolve hafoin eleitu.

“Ha’u espera kandidatu hotu-hotu ne’ebé mak ema tau naran tiha ona tenke hanoin ba dezafiu sira ne’e, katak momentu nia eleitu nia tenke book-an para rezolve,” Ramos Horta salienta.

Maske nune’e, nia dehan, tenke rezolve ho matenek atu garante nafatin paz no estabilidade.

“La’ós rezolve rungu-ranga ho radikalizmu ho destroizmu depois distabiliza situasun aat liután, ida ne’e mak dezafiu boot ba ita,” Ramos Horta subliña.

Entretantu Ramos Horta ba Jornalista sira hatete, Líder Nasionál Kayrala Xanana Gusmão sei apoiu nia kandidatura hodi hetan vitória iha eleisaun no hala’o kna’ar nu’udar prezidente repúblika ne’ebé hatúr ona iha Konstituisaun RDTL.

“Agora ita ita hotu servisu maka’as, maibé ha’u hakarak dehan, ohin ka aban ha’u simu ona informasaun husi Maun Xanana kona-ba ha’u nia kandidatura ne’e,” Ramos Horta komenta.

Entretantu Prezidente Repúblika Francisco Guterres Lú Olo iha loron 6-7 janeiru 2022, rona ona partidu polítiku sira ho asentu iha Parlamentu Nasionál hodi hatene sira-nia hanoin kona-ba data eleisaun prezidensiál ne’ebé sei akontese, pelu menus, loron neen nulu, molok Prezidente atuál ramata ninia mandatu iha 20 maiu 2022.

Prezidente Repúblika hala’o knaar ne’e tuir artigu 12 husi Lei númeru 7/2006, 28 dezembru, ho alterasoins susesivas ba Lei ne’e, katak, molok dekreta data eleisaun, tenke rona uluk Governu no partidus polítikus ho asentu iha Parlamentu Nasionál.

Iha oportunidade, Prezidente Repúblika apela ba partidu polítiku hotu-hotu atu kontinua kumpre nafatin medidas prevensaun ba Covid-19 tanba eleisoins prezidensiais sei akontese iha tempu ne’ebé mundu enfrenta dadaun variante foun, Omicron.

Partidu sira asentu iha Parlamentu Nasionál inklui Partido Democrático (PD), Partido da Libertação Popular (PLP), Frente Mudança (FM), Frente Revolucionária de Timor-Leste Independente (FRETILIN), Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT).

Molok halo enkontru ho líderes partidus polítikus sira-nian, Prezidente Repúblika rona tiha ona Governu, liuhusi Primeiru-Ministru, Jeneral Taur Matan Ruak no Ministru Administrasaun Estatal Miguel Carvalho.

Prezidente Repúblika rona mós Comissão Nacional de Eleições (CNE) no Secretariado Técnico de Administração Eleitoral (STAE) kona-ba preparativus ba eleisaun prezidensiál 2022.

Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022, sentru votasaun sei aumenta ba 1200. Númeru estasaun votu sei aumenta husi 1260 (iha 2018) ba 1500, iha tinan 2022.

Hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027. Nune’e, taxa partisipasaun eleitór sei sa’e iha eleisaun tuir mai.

Ho númeru sentru no estasaun barak liu, númeru votante iha fatin ida-idak sei menus. Tanba buka hamenus númeru eleitór halibur iha fatin ida, Governu Timor-Leste foti medida di’ak ida atu proteje mós ita nia ema husi vírus moras Covid-19 nian, ne’ebé sei la’o nafatin iha mundu, ho variante oioin.

No More Posts Available.

No more pages to load.