Dewan Solidaritas Munisípiu Ermera Realiza Konferénsia

by -650 views
Membru Dewan Solidaritas Postu Administrativu Atsabe foto hamutuk hafoin remata sosializasaun konaba buletin votus referendum nian. (Foto Arquivu Membru Dewan Solidaritas Atsabe)

DILI (Timor Post) – Atu manifesta nafatin ezisténsia organizasaun rezisténsia juventude Dewan Solidaritas Mahasiswa Pemuda Pelajar Timor-Timur (DSMPPTT) ka Konsellu Solidaridade Universitariu Juventude Timor- Lorosa’e (KSUJTL) ne’ebé iha ukun aan koñesidu ho naran Dewan Solidaritas sei hala’o konferénsia Munisípiu Ermera nian.

Membru Dewan Solidaritas Ermera halo deskusaun hodi prepara ba konferensia munisipiu nian

Ba Timor Post Sekretáriu Komisaun Organizadora Gil do Carmo Santos hateten, konferénsia Dewan Solidaritas nivel munisípiu iha Ermera ne’e ba dahuluk hala’o iha loron 30 Maiu 2015. Ba daruak nian sei hala’o iha Loron Sesta, (29/10) tinan ne’e.

Sai hanesan oradór ba konferénsia ho tema nafatin hametin pás no demokrasia ba asegura no lori estabilidade ba dezenvolvimentu nasionál; Eis koordenadór Dewan Solidaritas Antero Bendito da Silva, Sekretariu Estadu ba Asuntu Kombatente Libertasaun Nasionál Gil da Costa Monteiro ‘Oan Soru’, Deputadu Parlamentu Nasionál, Mariano Assanami Sabino, Vidal de Jesus “Riak Leman” no Padre Angelo Salsinha.

Tuir Gil, Dewan Solidaritas sai interveniente prinsipál ida iha tempu rezisténsia ba luta libertasaun nasionál, liu-liu durante períodu 1998 to’o 1999 nu’udar organizasaun movimentu rezisténsia juventude no determinante antes no depois ré formasaun Governu Indonézia.

Konta Gil, Dewan Solidaritas nafatin firmi reziste Luta ba auto determinasaun ka referendum bainhira organizasaun estudantíl ne’e aproveita janela oportunidade hosi movimentu demokratizasaun re formasaun iha Nasaun Indonézia 1998.

Janela oportunidade iha re formasaun ne’e hodi organiza diálogu no lidera palku libertasaun (mimbar bebas) iha Kampus UNTIM nu’udar baze konsentrasaun no hatutan to’o ba distritu no sub-distritu tomak iha Timor-Leste, hodi sukat hakarak lulik hosi povu iha rai doben ida ne’e.

Ezisténsia Dewan Solidaritas  dehan  Gil, sai hanesan sombriña ka salurik universitáriu, estudante no joven sira ka hamutuk Organizasaun Juventude Rezisténsia sira ne’ebé badinas no aten-brani luta ba kauza libertasaun nasionál.

Dewan Solidaritas ne’e organizasaun estudantíl ida ne’ebé ho baze iha UNTIM,  Dewan Solidaritas ho espíritu non-violénsia okupa públiku oi-oin iha Dili laran, espesiálmente okupa no paralizia funsionamentu Asembleia Parlamentár  Provinsiál (DPRD) Timor-Timur iha Dili no aktu oi-oin, kontra aktu violentu hasoru komunidade nu’udar parte hosi rezime ditadura Soeharto ka Governu Indonézia.

Atividade oioin hosi Dewan Solidaritas ne’e hetan rekoñesimentu internasionál liu hosi aprezentasaun ba atribui Prémiu Novel Estudante da Paz ka Novel Student Peace Price 1999”, prémiu ida ne’ebé espesialmente dedika ba luta estudante nian ba pás no dame iha mundu espesiál ba Timor-Leste. Dewan Solidaritas mak resipiente ka reprezenta dahuluk ba prémiu ne’e, nu’udar aktu rekoñesimentu Internasionál.

Hateten Gil Munisípiu Ermera nu’udar ramu prinsipál ida hosi organizasaun ne’e, labele haketak hosi prosesu tomak ba movimentu ne’e, hamutuk ho munisípiu seluk no organizasaun rezisténsia sira, lori povu ba auto determinasaun liu husi Referendum 1999.

“Iha era independénsia Organizasaun DSMPPTT assume nafatin kompromisu sira mehi ukun-an nian atu ba kontribui iha prosesu dezenvolvimentu iha setór oioin ne’ebé nia membru sira haknaar  an. Konferénsia no kongresu mak sai nafatin  aktu manifesta ezisténsia organizasaun nian,” tenik Gil hodi hatutan.

Hasoru konferensia Munisipiu Ermera nian, membru sira halo deskusaun konaba tema no orador sira ne’ebe atu kunvida

Lia fuan hanesan hato’o hosi Koordenadór Dewan Solidaritas Postu Administrativu Atsabe, João Raul de Oliveira. Nia hateten, konferénsia ne’e hodi deskreve kontribuisaun Dewan Solidaritas nian prosesu ukun rasik an.

“Espera ho prezensa oradór hirak ne’ebé iha kompeténsia ba rekoñesimentu luta na’in sira bele fó oportunidade ba Dewan Solidaritas nia membru sira hodi asesu ba rekoñesimentu no moos asesu ba direitu sira seluk,” Raul hateten.(Akompaña Nafatin Notisia Konferensia hosi Gleno iha Youtube Timor Post no Jornál iha edisaun tuir mai)        

No More Posts Available.

No more pages to load.