Deteta Tan Kazu Foun 13 Inklui Doutór Ida iha HNGV, “Situsaun Agora bolu ita Hotu nia Atensaun”

by -58 views

Timor Post (09/03/2021)—Médiku sira husi Sentru Integradu Jestaun Krize (SIJK) deteta tan kazu foun hamutuk-13 inklui professional saúder (Doutor) ida ne’ebé hala’o kna’ar iha Hospitál Nacional Guido Valadares (HNGV) ho nia oan na’in-rua ne’ebé hela mós iha bairro BTN2 besik ho pasiente feen-ho-laen ne’ebé tama ona iha sala izolamentu Vera Kruz, Dili.

Kazu foun ka pasiente foun COVID-19 na’in-13 ne’e inklui mós hirak ne’ebé iha kontaktu ho kazu na’in-ida iha Bebonuk no na’in-ida husi feen ho laen ne’ebé servisu iha Sekretaria Estadu Formasaun Profesionál no Empregu (SEFOPE).

Vise Koordenador Sentru Integradu Jestaun Krize (SIJK), Odete Maria Viegas liuhosi konferénsia ba imprensa ne’ebé hala’o iha Sala Situasaun SIJK, CCD, Tersa (09/03/2021) haktuir, bainhira ekipa konjunta saúde buka tuir ema hirak ne’ebé kontaktu besik ho kazu husi BTN2, iha SEFOPE deteta ema na’in-9, na’in-1 husi Bebonuk ne’ebé antes ne’e ekipa deteta estudante-1no na’in-3 iha professional saúde ho nia oan na’in-2.

Doutora Odete haktuir, resultadu screening ba iha fatin sira ne’ebé maka deteta kazu pozetivu hanesan BTN2, SEFOPE, no Saneamentu (ekipa raut foer) total hamutuk 471.

Nune’e, nia klarifika, ekipa foti amostra iha SEFOPE hamutuk 28, deteta na’in-9 mak pozitivu; amostra husi Bebonuk hamutuk-51 deteta na’in-1 pozitivu; no husi HNGV deteta ema na’in-3 inklui doutor ida ho nia oan na’in-2, no ekipa hodikalan halo kedas teste ba professional saúde sira hamutuk 32 maibé hatudu resultadu negativu.

Ho dezenvolvimentu kazu pozitivu iha kapital Dili, Doutora Odete konsidera situasaun atuál  obriga ema hotu nia atensaun ho sériu.

Nia dehan, ekipa konjunta kontinua tún ba terrenu hodi identifika nafatin ema hirak ne’ebé iha kontaktu ho sira hotu ne’ebé deteta ona pozitivu nune’e bele prevene lalais trasmisaun lokal ho lalais liu.

Ekipa sira halo nafatin swap ba ema sira ne’ebé iha relasaun ho kazu pozitivu iha loron hirak liu ba,” Doutora Odete salienta.

Entretantu, husi kazu foun 13 ne’e sura hamutuk total pasiente COVID-19 ne’ebé agora izola hela iha sala izolamentu Vera Kruz hamutuk 48.

Doutora Odete kontinua apela ba sidadaun hotu liuliu ema sira ne’ebé nia oan eskola iha Canossa, Cafe Timor Balide, International school iha Embaxada nia kotuk iha relasaun ba oan sira ne’ebe positivu hodi ba sentru saúde hodi halo teste swap.

“Situsaun agora bolu ita hotu nia atensaun, labele paniku,” Doutora Odete subliña.

Jornalista Jaime Pires
Editor Noémio Falcão

No More Posts Available.

No more pages to load.