Dili(timorpost)—Laiha fatin ba Grigorio Correia, atu assume fali Sekretáriu Jerál (SekJer) Federasaun Futeból Timor-Leste, tanba nia rezigna-an ona hosi kargu refere.
Informasaun ida ne’e Prezidente Asosiasaun Futeból Dili Leste, Aleixo Cobra, hatete ba Timor Post, iha nia Rezidénsia Bairru Grilos, Domingu(19/11).
“Ha’u haree Sekretáriu Jerál Federasaun Futeból Timor-Leste, Grigorio Correia, ne’ebé rezigna-an ne’e ba fali ona, ne’e labele, nia laiha fatin ba Sekretáriu Jerál, tanba nia rasik mak rezigna-an”, Prezidente Asosiasaun Futeból Dili Leste, Aleixo Cobra, informa.
Aleixo Cobra hatete, tanba ne’e mak asosiasaun futeból sira sei halo protestu hasoru SekJer FFTL ne’ebé maka rezigna-an tiha ona, agora fila fali ba atu assume fali kargu ne’ebé nia husik ona ne’e.
“Nia lakohi ona Sekretáriu Jerál ne’e mak nia rezigna-an ne’e, ne’ebé nia ba fali assume fali kargu hanesan Sekretáriu Jerál ami sei halo protestu hasoru nia”, Prezidente Asosiasaun Futeból Dili Leste, Aleixo Cobra, kestiona.
Tuir Aleixo Cobra katak, se prezidente interinu FFTL maka foti desizaun bolu SekJer FFTL ne’ebé rezigna-an ona hosi nia kargu, ne’e loloos laiha kompeténsia atu halo rekrutamentu, labele foti desizaun no labele hasai ema ruma iha FFTL.
“Prezidente Interinu FFTL ne’e laiha direitu atu foti desizaun, nein halo rekrutamentu ruma no labele hasai ema ruma”, Aleixo Cobra.
Nia subliña, Prezidente FFTL interinu ne’e hodi prepara kondisaun ruma hosi loron 10 fulan Novembru to’o 10 Janeiru atu realiza kongresu, la’ós foti fali ema ida rezigna-an ona ba fali assume ninia kargu.
Aleinde ne’e Notísia Post edisaun Sesta (10/11) Gregório Rezigna-an Hosi SekJer FFTL
Tanba respeitu desizaun membru sira hanesan asosiasaun no juveníl sira nian, Sekretáriu Jerál (SekJer) Federasaun Futeból Timor-Leste (FFTL), Gregorio Correia, rezigna-an hosi nia kargu.
“Ha’u deside rezigna-an hosi kargu ne’e ho razaun laiha ona konfiansa hosi membru Asosiasaun sira ba ha’u nia lideransa hanesan Sekretáriu Jerál FFTL, ne’ebé ha’u atu ko’alia tan saida, buat hotu-hotu loos ona, ha’u labele ko’alia tan tanba ha’u nia karta rezignasaun ne’e klaru kedas iha ne’ebá”, Sekretáriu Jerál Federasaun Futeból Timor-Leste (FFTL), Gregorio Correia, dehan liuhosi telefone, Kinta (09/11).
Nia dehan, haree de’it iha karta rezignasaun ne’ebé mak nia parte hato’o ona ba iha Prezidente Federasaun Futeból Timor-Leste (FFTL) no bele hatene razaun kona-ba nia parte hakarak rezigna-an hosi nia kargu refere.
Tuir karta rezignasaun hosi sekretáriu jerál nian ne’ebé mak Timor-Post hetan sita katak, Prezidente Federasaun Futeból Timor-Leste (FFTL), bazeia bá asuntu ne’ebé mak temi iha leten mak nia (Gregório Correia-red) liuhosi karta ida-ne’e hakarak hato’o rezignasaun hosi pozisaun Sekretáriu Jerál Federasaun Futeból Timor-Leste hahú hosi loron 26 fulan-Outubru 2023, Oras 00:01 OTL.
Razaun hirak ne’ebé fundamental, Gregorio Correia, nia desizaun hodi rezigna-an mak hanesan, Depois Kongresu anuál 2023 FFTL nian ne’ebé akontese iha loron 1 fulan-Jullu tinan 2023, membru asosiasaun 16 hosi total membru 21, fó votu kontra bá relatóriu semestre dahuluk atividade FFTL nian no inklui proposta no planu semester daruak hosi tinan 2023 nian.
Relasiona ho asuntu ida ne’e mak membru asosiasaun maioria la-fó ona konfiansa ba Presidente no nia estrutura tomak inklui Gregório Correia hanesan Sekretáriu Jerál FFTL.
“Ha’u nia deskulpa ua’in bá hadomi na’in futeból tomak karik iha ha’u nia mandatu la’o la tuir promesa ne’ebé hato’o bainhira ha’u hetan nomeiasaun”, Gregório Correia, hatete, iha karta rezignasaun. Mak ne’e de’it, ha’u nia karta hato’o bá exelénsia, ikus liu obrigadu bá kolaborasaun no servisu hamutuk durante ne’e”, Gregorio dehan.
Nune’e nia hato’o karta rezignasaun ne’e haruka mós kopia ida bá iha membru Ezekutivu FFTL, membru Asosiasaun Futeból Munisípiu 13, membru Asosiasaun Profisionál sira (Feto, Futsal, Arbitrajen, Treinadór, Juveníl).
909 total views, 15 views today
Bele hare Video Seluk :
Subscribe to Timorpost
