Dili (timorpost)—Apoiu hosi grupu Dragon Lotaria, Ekipa Federasaun Off Road Timor-Leste (TL) hetan primeiru lugar ba kompetisaun Off Road iha Kupan Nusa Tenggara Timur (NTT) Indonézia.
“Ha’u fó obrigadu barak ba kompañia Grand Dragon Lotaria, ne’ebé mak apoiu másimu ba ekipa Toni Lopes ninian, hodi reprezenta Off Road Timor-Leste ba tuir kompetisaun iha Kupan Indonézia konsege sai primeiru lugar iha eventu ne’ebé mak sira ba tuir ne’e”, dehan Prezidente Federasaun Off Road, Manuel de Araújo, liuhosi konferénsia imprensa, iha edifísiu Dragon Lotaria, Timor Plaza, Sábadu (04/03).
Nia dehan, tanba eventu ruma ka joga ruma kuandu ba kompete iha Kupan NTT, ne’e difisil tebes atu manan, maibé ho kompañia Dragon Lotaria nia apoiu tomak, ekipa Toni Lopes ninia servisu no preparasaun di’ik konsege manan iha eventu refere.
Nia subliña, tanba sira nia parte dezde uluk to’o agora sempre ba kompete beibeik iha ne’ebá, maibé nunka manan ema sira iha NTT ne’ebá, maibé agora ho ekipa Toni Lopes ninian konsege manan iha ne’ebá da-rua, uluk iha Belu Atambua agora iha Kupan.
“Maibé agora sai kampiaun ka primeiru lugar ne’e eventu ida ne’ebé mak boot liu, tanba eventu ne’e governu Indonézia mak loke, la’ós klube mak loke, tanba fatin ne’ebá iha indústria ninian, tan ne’e ita orgullu ekipa Toni Lopes ninian”, nia deklara.
Iha sorin seluk Atleta, Toni Lopes, dehan nia parte sai kampiaun iha eventu Kompetisaun Off Road iha Kupan Indonézia ne’e ho klase 4.800cc, ne’ebé agradese, tanba bele sai primeiru lugar.
“Taxa ne’e ha’u manan la fasil, maibé difisil tebes, tanba iha difikuldade no dezafiu barak ne’ebé ha’u enfrenta, tan ne’e taxa ne’e ha’u entrega ba ha’u nia sponsor Dragon Lotaria, ha’u sente sira merese duni rai taxa ida ne’e”, nia hatete.
Nune’e mós CEO, Grand Dragon Lotaria Timor-Leste, Datuk Harry, dehan hanesan ema hotu hatene, Motto Dragon Lotaria Timor-Leste ninian katak gosta servisu hamutuk ho ema ne’ebé iha atensaun atu mehi boot.
“Iha ami nia motto mak One Dolar One dream ‘Dolar Ida Mehi Ida’. Ami mak ema ne’ebé halo mehi ‘Dream makers’ no ami hanoin barak kona-ba mehi-na’in sira, ami gosta servisu ho ema ne’ebé iha atensaun atu mehi boot hanesan ami iha Ekipa Grand Dragon Off Road Racing”, nia dehan.
“Ha’u hakarak hato’o ha’u-nia parabéns boot liu ba Ekipa Grand Dragon Off Road Racing, ne’ebé manán ona kompetisaun Espesiál Faze Kampiaun Off Road 2023 iha Kupan Indonézia foin lalais ne’e. Ho sira nia prestasaun ne’ebé sira hetan halo nasaun ne’e orgullu, halo Timor-oan hotu orgullu”, nia deklara.
Nia subliña, buat ne’ebé nia hetan mak buat ne’ebé furak tebes, ida ne’e hatudu ba ema hotu valór servisu ekipa nian, dixiplina no espíritu atu manán, ida ne’e hanesan modelu papél ba nasaun ne’e no hein katak ida ne’e sei fó inspirasaun ba Timoroan barak liután atu hanoin boot no hanoin hanesan kampiaun ida.
625 total views, 3 views today
