Dili (timorpost.com)—Treinadór Klube Akadémika Fc, Luzinho dos Santos, dehan jogu kontinua kontra Portu Taibesi Fc, nia ekipa difisil uitoan.
“Ami nia preparasaun ba terseiru jogu ninian, ha’u hanesan treinadór ba ekipa sente difisil uitoan, tanba ami foin jogu horisehik kontra Aitana Fc no aban Domingu atu joga fali kontra Portu Taibesi Fc”, dehan Treinadór Akadémika Fc, Luzinho dos Santos, liuhosi konferénsia imprensa ne’ebé mak realiza iha Estádiu Munisipál Dili, Sesta (03/03/2023).
Nia dehan, tanba foin halo jogu hotu liu de’it loron ida joga tan fali entaun ne’e problema, haree ba jogadór sira nia kondisaun seidauk bele rekoopera hotu tama kedas fali jogu ida ne’e, tanba ida ne’e mak difisil.
Tanba jogadór sira kolen maibé ida ne’e hanesan obrigasaun ida no sira tenke hasoru duni ekipa Portu Taibesi Fc iha jogu datoluk primeiru divizaun LFTL époka ida ne’e.
“Ne’ebé ami sei halo nafatin preparasaun ho di’ak maski kolen, maibé kontinua treinu nafatin hodi hasoru Portu Taibesi Fc iha jogu datoluk, tanba Portu Taibesi Fc mós ekipa ida ne’ebé mak forte maski sira lakon iha jogu dahuluk”, nia hateten.
Tanba sira iha jogu dahuluk lakon entaun sira komesa hadi’a-an no prepara-an durante semana ida resin ne’e nune’e bele manan jogu daruak ida ne’e, maibé sira mós sei la husik oportunidade livre atu sira hatama golu.
“Ha’u mós iha ona planu atu hasoru Portu Taibesi Fc ho ami nia rekursu jogadór ne’ebé mak iha sufisiente no ami mós hakarak manan nafatin, tanba ne’e ita sei hatene rezultadu ikus depoin de jogu remata mak bele hatene”, nia esplika.
Maibé ba loron ohin ninia sira sei la treinu, tanba jogadór sira sei kolen no aban mak sei hahú fali sira nia treinu nune’e domingu bele hasoru ekipa Portu Taibesi, maibé estratéjia sira ne’e iha ona inklui jogadór line up ne’e nia parte hanesan treinadór preparadu ona.
“Tanba ne’e ekipa Akadémika nafatin optimist atu manan tan jogu datoluk hasoru Fc Portu Taibesi Fc, tanba ha’u hanesan treinadór fó fiar tomak ba ha’u nia jogadór sira atu bele manan jogu ida ne’e tan”, nia hakotu.
897 total views, 3 views today
