DILI (Timor Post.com)— Treinadór klube Assalam FC, Gaspar Amaral, dehan ekipa As Ponta Leste forte no sai favoritu bele sai kampiaun iha Liga Futeból Timor-Leste (LFTL) époka 2022-2023.
Deklarasaun ne’e nia hato’o liuhosi Konferénsia Imprensa ne’ebé mak realiza iha Estádiu Munisipál Dili, Kuarta Feira (01/03/2023), ne’e hodi ko’alia kona-ba preparasaun jogu aban ninian kontra As Ponta Leste.
Nia dehan, maibé Assalam nia preparasaun ba jogu hodi hasoru ekipa adversáriu sira iha semana ida ne’e liu-liu hanesan As Ponta Leste ba iha jogu divizaun dahuluk LFTL ninia.
“Maibé ita hotu hatene ekipa As Ponta Leste ekipa ida ne’ebé mak forte tebes no sira kompete iha Primeiru Divizaun dezde uluk to’o agora no tinan ida ne’e ita haree sira tama iha ekipa favoritu atu sai kampiaun ba Liga”, dehan Gaspar Amaral, ba jornalista sira iha Estádiu Munisipál Dili.
Nia subliña, tanba ne’e kona-ba jogu hasoru Ponta Leste garantia atu manán ka lakon ne’e nia labele promete, maibé jogu termina minutu 90 mak foin bele hatene nia rezultadu lakon ou manán.
“Maibé iha jogu dahuluk ami parte observa ona Ponta Leste nia frakeza balun no prepara ona nia jogadór sira atu aproveita nune’e bele buka oportunidade hatama golu”, nia haktuir.
Fó hanoin fali katak, iha jogu primeiru divizaun dahuluk Liga Timorense époka ne’e ekipa Assalam konsege manán ona dala ida kontra Emmanuel Fc, enkuantu ekipa As Ponta Leste hetan de’it pontu ida hafoin empate ho Akadémika Fc.
Nune’e mós jogu da-ruak primeiru divizaun Liga Futeból Timor-Leste (LFTL), entre ekipa Assalam hasoru Ponta Leste ne’e sei realiza iha Estádiu Munisipál Dili, Sesta (03/03/2023) tinan ne’e.
2,776 total views, 3 views today
Bele hare Video Seluk :
Subscribe to Timorpost
