DILI (timorpost.com) — Órgaun Liga Futeból Timor-Leste (LFTL), sei haruka karta ba lider sira inklui mós ba membru governu sira hodi partisipa serimónia abertura Liga époka 2022 ba 2023 ne’e.
“Sim, naturalmente abertura, ita sei halo konvite no haruka ba iha ita nia entidade kompetente sira hotu nune’e sira bele mai partisipa iha abertura liga Futeból Timor-Leste époka ida ne’e, ne’ebé mak sei monu iha loron 17 fulan Fevereiru tinan ne’e”, informa Diretór Informasaun LFTL, Diego Neto Fraga, ba Timor-Post, iha Estádiu Munisipál Dili, Tersa (14/02).
Tanba ne’e, konvite sira ne’e sei to’o iha lider sira nia meza hahú ohin ba oin, nune’e sira ne’ebé disponivel atu partisipa abertura liga iha loron Sesta Feira semana ne’e.
“Ne’ebé ita nia konvite ba iha entidade kompetente ne’ebé sira iha ligasaun direita mai iha Liga Futeból Timor-Leste, hanesan Sekretáriu Estadu Juventude no Desportu, inklui autoridade seguransa sira ne’ebé mak bele fó seguransa ba kada jogu ne’e”, dehan Diego.
Nia subliña, maibé kona-ba kampu mak iha problema uitoan, maibé estádiu ne’ebé mak iha nivel internasionál uitoan mak estádiu Dili ona, tanba ne’e mak sei uza nafatin Estádiu Dili hahú hosi jogu dahuluk to’o remata.
“Kona-ba arbitrajen ba atividade liga nia ne’e ita ho FFTL hosi inisiu ne’e servisu hamutuk ne’ebé mak di’ak hahú hosi finansiál support inklui tékniku ninian, tanba ne’e laiha problema ka duvida kona-ba arbitrajen sira atu mai lidera jogu iha liga ne’e”, nia hateten.
Nia aumenta, maibé sira durante loron hirak nia laran ne’e asiste parte arbitrajen ninian mós hola treinu no preparasaun namanas hela hodi lidera jogu liga futeból Timor-Leste ninia hahú hosi inisiu to’o jogu remata durante fulan tolu nia laran.
1,312 total views, 3 views today
Bele hare Video Seluk :
Subscribe to Timorpost
