DILI (timorpost.com) – Atu hatudu prestasaun di’ak iha kompetisaun, Prezidente Federasaun Taekwondo Timor-Leste (FFTL), Gabriel da Costa, husu ba atleta sira kontinua dixiplina.
Deklarasaun ne’e nia hato’o hafoin partisipa iha serimónia abertura ba kompetisaun Internasionál Taekwondo Junior Championship, ne’ebé realiza iha Jináziu Desportu Dili, Kinta (22/12), dadeer ne’e.
“Ha’u hakarak husu ba imi kontinua aprende no treinu maka’as liután hodi aumenta imi nia skill no talentu kona-ba tékniku ninian nu’udar Atleta ida, maibé keta haluha aprende mós oinsá respeita ema seluk liuliu ba família uma laran,” dehan Gabriel, iha Jináziu Dili, Kinta (22/12).
Nia aumenta, hanesan ema Desportivu pontu importante ida ba atleta atu hetan prestasaun di’ak mak tenke iha dixiplina ne’ebé di’ak nune’e mós iha tékniku inklui fíziku sira hotu.
“Ita kuandu iha tékniku kona-ba treinu ne’ebé durante ita treinu ne’e di’ak maibé dixiplina laiha mós pontu fraku ida ba ita, tanba ne’e mak ha’u apela ba atleta sira hotu nune’e mós ba klube no Dozan sira iha territóriu tomak tenke hanorin mós matéria ba dixiplina nia forte liután ba atleta sira,” nia apela.
Nia subliña, hanesan Aman ba Federasaun Taekwondo Timor-Leste, lakohi haree no rona sosiedade ka komunidade sira temi Atleta Taekwondo sira laiha dixiplina ka étika moral ninian.
“Nune’e ha’u apela ba atleta sira ita hotu kontinua asegura Federasaun Taekwondo nia naran hodi kontinua morin nafatin, iha sosiedade nia leet, entaun liuhusi ita-nia dixiplina no étika moral ba ita-nia sosiedade tomak liuliu ba ita-nia família uma laran Espesiál ba ita-nia Inan-Aman sira,” nia hateten.
Nia reforsa, kontente kona-ba kompetisaun Internasionál Taekwondo Junior Championship, ne’ebé realiza husi Klube Dragon UNTL, ne’e tanba liuhusi kompetisaun ne’e bele hasa’e atleta sira-nia talentu no esperiénsia mentalidade sira hotu, maibé husu ba atleta sira kontinua respeita malu kuandu kompete iha eventu ne’e.
“Lakon ka manán ne’e normál iha kualkér eventu maibé ita kontinua respeita malu nafatin kuandu remata fighting iha palku leten, no hakuak malu nafatin, ba sira ne’ebé lakon kontinua prepara an no esforsu treinu maka’as liután hodi tinan oin ka ba eventu seluk bele manán,” nia hakotu.
2,116 total views, 3 views today
Bele hare Video Seluk :
Subscribe to Timorpost
