DILI (timorpost.com) — Sekretáriu Estadu Juventude no Desportu (SEJD), hamutuk ho Ministériu Edukasaun, Juventude no Desportu (MEJD), Tersa (20/12), atribui prémiu ba Atleta Nasionál husi Federasaun Akadémika Desportu Timor-Leste (FAD-TL) ho Komité Paralímpiku Nasionál Timor-Leste (CPNTL).
Ministru Edukasaun, Juventude no Desportu, Armindo Maia, hatete distribuisaun prémiu ida ne’e tanba durante ne’e atleta sira kompete iha jogu Asian University Games (AUG) iha Tailándia no Asian Para games iha Solo-Indonézia tinan ida ne’e.
“Prémiu ida ne’e atribui ba atleta sira tanba ita-nia atleta sira konsege manan iha jogu desportu nivel rejionál no internasionál, hanesan, iha Solo-Indonézia ho Tailándia tinan ida ne’e”, nia dehan liuhosi diskursu, Tersa (20/12).
Governante ne’e informa, husi jogu rua ne’e, total atleta hamutuk kuaze 20 resin, konsege oferese medalla lubuk ida mai Timor-Leste.
Tanba ne’e, lori Oitavu Governu Konstitusionál nia naran hato’o parabéns ba atleta manan na’in sira, jogu Asian Para games no Asian University Games no la haluhan mós treinadór sira.
Husi atribuisaun prémiu ne’e la’ós fó satisfasaun ba atleta sira, maibé sei fó insentivu no enkoraja hodi luta hasa’e prestasaun nian.
Modalidade Atletizmu Asian Para games iha Solo-Indonézia ne’ebé hetan prémiu hanesan, Domingos 10,500.00 USD, Domingas, Teófilo Freitas 10,500.00 USD, Treinadora Odete Belo 2.500,00 USD.
Parte Modalidade Hit Besi (Alterofilizmu), José António Aniceto Serrano, jogu iha 65 kg, hetan prémiu dollar Amerikanu 3.000,00 USD, Treinadór João Henrique de Deus, 1,500.00 USD.
Modalidade Ténis Meza husi atleta, Abelita Fernandes Borges ho osan 2.500 USD, Pascoela dos Santos Pereira dollar Amerikanu 4,000.00 USD, Bernardo de Carvalho 750 USD, Treinadór Rogério Tadeu Cabral Soares, 2,500 USD.
Enkuantu jogu Asian university games (AUG) ne’ebé halo iha Tailándia, kompostu husi modalidade tolu hanesan; modalidade atletizmu ho atleta Felisberto de Deus, atribui prémiu ho montante 1,750.00 USD, modalidade volley Praia ho atleta Joel Savio Valente 2,500.00 USD, Tito Morais Gusmão 468.75.00 USD. Modalidade Taekwondo ho atleta Ana da Costa Belo 750.00 USD.
Iha fatin hanesan, atleta nasionál husi Federasaun Atletizmu Timor-Leste (FATL), Felisberto de Deus, sente orgullu ho prémiu ne’ebé Governu liuhusi Sekretáriu Estadu Juventude no Desportu (SEJD) atribui, ajuda tebes hodi sosa fasilidade treinu nian.
“Ha’u agradese ba Governu liuhosi Sekretáriu Estadu Juventude no Desportu, ne’ebé distribui prémiu mai ami, hanesan atleta sente orgullu tebes”, katak nia.
Nia dehan, sente satisfás ho prémiu ne’ebé SEJD atribui, no sei uza hodi selu eskola no kompleta nesesidade loron-loron nian.
Entretantu partisipante iha serimónia hanesan, Ministru Edukasaun, Juventude no Desportu (MEJD), Armindo Maia, Ministra Saúde (MS), Odete Maria Freitas, entidade Governu no reprezenta UNICEF, Defisiénsia inklui funsionáriu Sekretáriu Estadu Juventude no Desportu (SEJD).
1,208 total views, 3 views today
Bele hare Video Seluk :
Subscribe to Timorpost
