DILI (timorpost.com) – Prezidente Federasaun Futeból Timor-Leste (FFTL), Francisco Jerónimo, hatete maski Prezidente Liga Futeból Timor-Leste (LFTL), Nilton Gusmão, rezigna-an ona husi nia kargu, maibé Futeból tenke la’o ba oin nafatin.
“Ha’u deklara dala-barak ona katak Futeból tenke la’o ba oin, ho modelu saida de’it bola ne’e tenke la’o ba oin, ita labele hapara, ema se de’it mak rezigna-an husi nia funsaun hanesan lideransa laiha problema, maibé bola tenke la’o ba oin,” nia hateten hafoin hasoru Primeiru Ministru, Taur Matan Ruak, iha Faról Segunda (19/09).
Nia dehan, modelu saida de’it sira sei kontinua halo ba oin, atu realiza Liga ka la’ós Liga mós laiha buat ida, maibé bola la’o ba oin nafatin, labele para iha dalan klaran.
“Prezidente LFTL nia karta rezignasaun ne’ebé ha’u haree ne’e, tanba razaun servisu barak liu fahe tempu la to’o hodi halibur no mós atu realiza enkontru ruma, tanba ne’e mak nia husu atu rezigna-an,” hateten nia.
Atuál Ministru Asuntu Parlamentár no Komunikasaun Sosiál ne’e reforsa, karta rezignasaun ne’e hato’o ba Prezidente Asembleia Jerál Liga Futeból Timor-Leste (LFTL), Miguel Manitelo, nune’e mós Sekretáriu Estadu Juventude no Desportu (SEJD), Abrão Saldanha, no nia hanesan Prezidente FFTL.
Nia subliña, kona-ba Liga Futeból Timor-Leste (LFTL), antes ne’e dehan atu realiza iha fulan Agostu maibé la realiza nafatin, agora kontinua diskusaun la’o hela.
“Sim, diskusaun kontinua la’o hela, maibé liga la’ós ami mak organiza, parte ida mak organiza, entaun antes ne’e ha’u dehan iha fulan Agostu la’o ona, maibé seidauk la’o tanba parte ida seidauk organiza, tanba ami FFTL hanesan patrosinadór de’it,” hateten nia.
Jerónimo esplika, tanba sira hanesan Federasaun Futeból Timor-Leste (FFTL), hamutuk ho Governu liuhusi Sekretáriu Estadu Juventude no Desportu (SEJD), apoiu de’it orsamentu, maibé órgaun Liga nian iha, entaun órgaun Liga mak realiza.
5,068 total views, 3 views today
Bele hare Video Seluk :
Subscribe to Timorpost
