DILI (Timor Post) – Sekretáriu Estadu Juventude no Desportu (SEJD), Abrão Saldanha, husu ba jogadór sira atu kuidadu kampu Multifunsaun ne’ebé lokaliza iha Bidau Lesidere.
“Ita agradese ba Governu Repúblika Populár Xina tanba, sira bele apoiu halo kampu ida ne’e hodi fó ba ita, liuliu kontribui ba dezenvolvimentu desportu iha Timor-Leste,” nia hateten iha Lesidere, Sesta (30/08).i
Na dehan, kampu ida ne’e fas parte kontribuisaun país amigu Timor-Leste nia liuliu Xina halo ho gratuitamente hodi oferese ba Governu hodi bele utiliza halo jogu desportivu sira.
“Ita-nia fasilidade ida ne’e sufisiente hodi halo eventu jogu ruma, maibé ha’u mós husu ba jogadór sira tantu Feto no mane, liuliu joven sira atu kuidadu kampu ida ne’e, baihira uza kampu ida ne’e,” deklara nia.
Kampu multifunsaun bele halo jogu lubuk iha hotu kampu nia laran, tanba ne’e tenke kuidadu atu nune’e uza ho durasaun tempu naruk.
“Maibé ita-nia dezenvolvimentu ba infraestrutura Desportu nia sei kontinua la’o tuir ita-nia kapasidade, maibé tenke kuidadu uluk ida ne’ebé iha ona, tantu halo husi Governu no apoiu husi ita-nia nasaun amigu sira,” nia reforsa.
Abrão subliña, kampu foun ne’e sei responsavel másimu husi sira-nia parte, kuandu ema ruma ka instituisaun ruma atu realiza jogu iha kampu ida ne’e tenke ba husu autorizasaun husi sira.
“Maibé ha’u sei forma ekipa ida hodi responsavel direita ba kampu ida ne’e, atu nune’e iha ema ruma ka instituisaun ruma hakarak uza kampu ne’e hodi halo atividade jogu ruma, bele ko’alia direita ho sira no ba rejitu iha sira,” nia hakotu.
2,546 total views, 6 views today
Bele hare Video Seluk :