Deskonfia Diretór Feliciano Komete Krime Abuzu Poder no Partisipasaun Ekonomia, KAK Ezekuta Mandadu Buska no Apreensaun

by -1.227 views

Jornalista Jaime Pires / Editór Noémio Falcão

DILI (Timor Post)—Tribunál Distritál Dili (TDD) suspeita no aplika mandadu buska iha domisíliu no prende sasan Feliciano da Costa Correia nu’udar Diretór Kabotajen Nasionál (DCN sigla Portugués) tanba deskonfia komete krime abuzu poder no partisipasaun ekonomia relasiona ho kontratu ró Tranship II husi Indonézia.

Mandadu ne’e ezekuta husi Komisaun Antí Korrupsaun (KAK), Segunda (16/08/2021), tuku 9 dader tuir órden hahú ona prende dokumentu no sasan evidénsia sira iha Administrasaun Portuáriu Timor Leste (APORTIL) no kontinua ba halo operasaun buska no apreensaun iha rezidénsia Diretór Kabotajen Nasionál, Feliciano da Costa Correia.

Operasaun KAK iha APORTIL konsege prende tiha ona dokumentu lubuk ida no karreta estadu ne’ebé Diretór Feliciano uza.

Entrevista ho Jornalista sira, Diretór APORTIL, Flávio Neves hatete, nia parte kopera ho autoridade judisiáriu hdi fasilita dokumentu hotu ne’ebé resiza. Maibé nia subliña, kona-ba kontratu no pagamentu ba ró Tranship II Ministériu Transporte no Komunikasaun nia kompeténsia.

“Kontratu ministru mak aprova diretamente. APORTIL partisipa hanesan orsamentu ne’ebé maka bazeia ba hirarkia. Kona-ba prosesu pagamentu, invoice ministru mak aprova, ha’u hanoin pagamentu seidauk la’o,” Flávio hatete.

 

Fó hanoin fali katak, Governu daualu lideradu Taur Matan Ruak liuhusi Ministériu Transporte no Komunikasaun (MTK) kontrata ró Tranship II husi Indonézia atu substitui ró Berlin Nakroman ne’ebé hala’o hela manutensaun no Ró Sucses nia dokumentu mate. Maibé tanba ró Tranship II bainhira too iha Dili no halo operasaun dahuluk ba Autaúro no Oekusi hatudu kondisaun ladi’ak maka governu hapara hikas.

Kontratu governu ho ró Traship II  mosu pro no kontra maka’as. Balun dehan governu la devia aluga tan ró tanba maske Nakroman mak ba halo manutensaun maibé ró Sucses bele halo hela operasaun maske dokumentu mate ho rajaun labele ba trata iha Malázia tanba problema COVID-19.

No More Posts Available.

No more pages to load.