Ema Deskoñesidu Taa Kanek Traballadór “Moris Rasik” Na’in Ida Iha Alas

by -1.520 views
Vitima Abrão Pinto hetan hela asisténsia hosi médiku sira, Imajen Espesial

(Reportajen Korespondente Munisipiu Manufahi Luis Casmeiro/Editor Mateus da Cruz)

MANUFAHI— Maizumenus tuku sanulu resin rua meiudia, ema deskoñesidu Taa Kanek Traballadór “Moris Rasik” Na’in Ida, Iha Alas iha Postu Administrative Alas, Munisípiu Manufahi.

Kazu ne’e akontese Segunda horisehik. Tuir informasaun sidadaun joven ne’e ho naran kompletu Abrão Pinto ho idade 28.

Vítima ne’e hela iha Postu Aadministrative Fatuberliu servisu hanesan setor osan moris rasik nian.

Vítima hanesan traballadór hosi “Moris Rasik”ne’ebé responsavel setor osan hosi área mota Kelen, Selihasan no Feriksare, Suku Taitudan, Alas.

Xefe Sentru Saúde Postu Alas, José Martins da Costa, hatete, vítima ne’ebé hetan taa hosi ema deskoñesidu ne’e hafoin konsulta remata fila ona ba uma.

“Vítima hetan ta’a iha parte ulun suku pontu sanulu resin lima (15) no mós kabaas parte kotuk laran suku pontu sanulu (10)”,informa, via telefone, Segunda, (11/04).

José haktuir, bazeia ba informasaun hosi vítima ema ne’ebé taa nia iha motor leten nia rasik la koñese oin maibé hare de’it sidadaun mane ida metan ain aas maka lori hena metan kesi metin oin hafoin duni tuir nia hodi taa.

Hafoin taa iha vítima nia kabaas parte liman los, pasta ne’ebé vítima tara iha kabaas ne’e monu no deskoñesidu ne’e foti pasta ho osan halai liu.

Vítima monu tun no hakilar hafoin ne’e komunidade sa’e ba ajuda nune’e kontaktu ambulánsia tula ba hospital Fui Leur, Alas.

Tuir video ne’ebé Timor Post asesu, vítima informa ba ninia superior katak ema deskoñesidu taa ona nia.

“Maun ema taa ha’u to’o ran fakar iha dalan no osan iha pasta ema  deskoñesidu hadau lori halai tiha, sorte ha’u monu motor la hanesan, motor mak hanehan nia tau ha’u mate liu”, dehan vítima.

Enkuantu pasta ne’ebé vítima lori ema deskoñesidu hadau ne’e seidauk bele hatene osan hira mak iha laran no hein ba prosesu investigasaun mak ita foin hatene. (Lee notisia seluk iha Timor Post/Asesu You Tube Timor post)

No More Posts Available.

No more pages to load.