Desizaun Finál ba Kazu Topu Honis, Xanana Hamutuk ho Vítima no Eis Padre RD iha Tribunál

by -2.300 views
Foto Espesial

Oekusi (Timor Post)—Líder Nasionál Kayrala Xanana Gusmão hamutuk ho vítima sira marka prezensa iha Tribunál Rejiaun Autónomu Espesiál Oekusi Ambeno (RAEOA) hodi akompaña desizaun finál kona-ba kazu relasaun seksuál (pedofilia) ne’ebé deskonfia komete husi eis Padre Amerikanu Richard Dasbackh (RD).

Lee Notisia Relevante: Vítima ba Kazu Topu Honis Tanis no Halerik Bainhira Polísia Lori Richard Dasbackh ba Prizaun, Defeza sei Halo Rekursu

Observasaun haktuir, vítima sira la’o tuir Xanana tama ba tribunál no arguidu RD akompaña husi advogadu sira túr iha odamatan sala audénsia nian hodi hein juis anúnsia desizaun finál ba kazu ne’e.

RD hetan akuzasaun husi Ministériu Públiku komete relasaun seksuál hasoru labarik menoridade sira iha orfonatu hanaran Topu Honis ne’ebé nia rasik mak harii dezde tempu Indonézia.

Lee Notisia Relevante: Tribunál Deside Kadeia Tinan 12 ba Eis Padre Richard Dasbackh

Maske nune’e, durante julgamentu Richard rejeita total akujasaun hirak ne’e.

Xanana inklui mos iha kazu ne’e tanba simu relatóriu investigasaun husi Komisaun Justisa i Paz (KJP) Dioseze Dili nian kona-ba kazu ne’e, ne’ebé konsideradu viola segredu justisa. Tanba ne’e, organizasaun hanaran JU,S (Juridiku Sosial) lori prosesu ba Tribunál Distritál Dili (TDD) no autór sira produz relatóriu ne’e inklui Padre Hermínio Fátima Gonçalves, José Cardoso Moreira, Andre Gonçalves no Libania Martins Amaral sai arguidu.

Durante julgamentu arguidu Padre Hermínio rekoñese fó duni kopia relatóriu ne’e ba Xanana no fó mos ba Padre sira iha kongregasaun SVD iha Kuluhun, Díli, hodi halo tradusaun ba lian Inglés. Maibé kona-ba publika ba publiku nia rasik laiha koñesimentu.

Lee Notisia Relevante: Kandidatura Prezidente Repúblika Milena Pires nia Pozisaun Kona-ba Kazu Topu Honis

Padre Herminio ho nia ekipa hetan autorizasaun verbal husi Bispu Dioseze Dili, Don Virgílio do Carmo da Silva mak ba Oekusi hodi halo investigasaun kona-ba keixa sira visum obrigatóriu ba labarik sira no produz relatóriu, maibé ikus mai Don Virgílio rasik demite Padre Herminio nu’udar Diretór ba KJP bainhira JU,S lori prosesu ba TDD.

Kona-ba prosesu ida ne’e, TDD sei rona mos Xanana nu’udar sasin molok foti desizaun finál.

Entretantu Xanana iha entrevista ho jornalista sira subliña, nia akompaña di’ak kazu ne’e no fi’ar lia loos ne’ebé tribunál hatúr no kondena maka’as pessoal no organizasaun sira ne’ebé halimar foer iha kazu ne’e. (cao)

No More Posts Available.

No more pages to load.