Desizaun CNE la Vale, TR Deside Timoroan Iha Austrália Tuir Votasaun

by -1.134 views
Prezidente Tribunal Rekursu (PTR), Deolindo Dos Santos, fó sai rezultadu ba jornalista sira iha nia servisu fatin, Tribunal Rekursu, Kaikoli kinta (10/03). Foto TP/jaime pires

(Reportajen Jaime Pires/ Editor Mateus da Cruz)

Dili (Timor Post)- Tribunal Rekursu deside desizaun Komisaun Nasionál Eleisaun (CNE) la vale, no sidadaun sira iha Austrália bele tuir votasaun ba eleisaun prezidensiál iha loron 19 de Marsu 2022.

“Durante ne’e iha diskusaun públiku ko’alia kona-ba atu realiza eleisaun ba sidadaun sira iha Austrália, entaun rekursu rua mak tama mai Tribunal, ida husi Kandidatura Francisco Guterres Lu’olo nian, no ida mai husi partidu CNRT nian,” Prezidente Tribunal Rekursu (PTR), Deolindo Dos Santos, fó sai rezultadu ne’e ba jornalista sira iha nia servisu fatin, Tribunal Rekursu, Kaikoli kinta (10/03).

Iha rekursu rua ne’e mai ho fundamentu ne’ebé hanesan, kona-ba desizaun CNE nia ne’ebé la permite atu realiza eleisaun iha Austrália ne’e. Tanba kandidatura na’in 2 dehan, CNE viola konstituisaun artigu 47 númeru primeiru Konstituisaun Repúblika.

“Depois de Tribunal simu tiha prosesu ne’e, Tribunal notifika CNE, STAE no PJR, hodi CNE fó resposta ba rekursu rua ne’e, PJR fó nia paraser kona-ba rekursu rua ne’ebé hato’o mai ne’e,” dehan Nia.

Tanba prosesu ne’e iha rua, entaun prosesu ida ikus ne’e tenke halo apresiasaun ba iha primeiru, entaun prosesu ne’e Tribunal ordena atu hasai prosesu hamutuk ba ida de’it no desizaun mós sai ida de’it.

“Depois ida ne’e hotu Tribunal halo apresiasaun ba rekursu rua ne’e nia desizaun mak ko’alia ba buat rua tanba rekursu mai rua, entaun ida mak anula desizaun CNE, entaun primeiru Tribunal deside desizaun CNE nia ne’e nulu no segundu desizaun CNE nia ne’e kontra konstituisaun,” Nia dehan.

Tanba apresiasaun Tribunal primeiru hare liubá kestaun prosesual tanba  Tribunal haree iha lei eleisaun prezidensiál nian

Baze fundamentu ida ne’ebé mak Tribunal foti hodi konsidera desizaun  CNE nia ne’e nulu tanba  iha períodu ida ne’ebé mak maizumenus kuaze 30 dias atu tama ba eleisaun ne’ebé mak marka ona iha loron 19 de Marsu, ne’ebé mak tuir loloos labele ona atu foti desizaun ida ne’e, tanba ne’e mak Tribunal foti desizaun katak desizaun CNE nia nulu ka la vale.

“Ho ida ida ne’e mak Tribunal deside desizaun CNE nia ne’e nulu, depois segundu mak Tribunal halo apresiasaun ida tan mak Tribunal to’o konkluzaun ida katak, bainhira CNE nia desizaun deside la permite atu realiza eleisaun iha Austrália ne’e viola direitu fundamental sidadaun sira nia atu ezerse sira nia direitu de votu, tanba ne’e mak Tribunal hadia desizaun katak CNE kontra konstituisaun artigu 47 númeru primeiru Timor-Leste nian,” Nia deklara

Tanba tuir artigu 50 no 51 lei númeru 32/2028 nian dehan nulu, entaun disizaun Tribunal dehan nulu ne’ebé signifika desizaun CNE la permite atu realiza eleisaun ba sidadaun sira iha Austrália ne’e la Vale, no sidadaun sira sei kontinua tuir eleisaun no sei tuur votasaun. .(Lee notisia seluk iha jornal Timor Post/asesu youtube Timor Post)

No More Posts Available.

No more pages to load.