Deputadu PLP konsidera Ema Sunu Sasán Sesta Báziku hanesan Avaliasaun

by -137 views

Timor Post (01/12/2020)- Komunidade Lakluta-Vikeke sunu sasán Sesta báziku, konsidera hanesan povu mak halo avaliasaun ba governu, tuir Deputadu hosi Bankada Governu iha Parlamentu Nasionál, Sabino ‘Guntur’.

“Sasán sesta báziku ne’ebé hetan sunu ne’e ita haree hanesan povu rasik mak avalia programa governu, tanba sente buat ne’ebé governu halo ladún dignu ba ita nia sosiedade”, Guntur informa ba jornalista sira iha parlamentu nasionál, Tersa (01/12).

“Kritika ida ba ita nia governu hodi bele hadi’a sistema bázika, ne’e parte ida bele dehan halo persuiju ba ita nia despeza, tanba ita hatene katak ita nia sosiedade ne’e sei moris ne’e normal hela tanba saida mak tenke aplika buat ida hanesan ne’e, ho razaun ida ne’e sei iha kontinuidade sei implika ba ita nia despeza estadu”, nia dehan.

Sikun seluk tuir Prezidente Bankada CNRT, Duarte Nunes, konsidera komunidade sira insatisfeitu hamosu asaun ne’e hasoru governu tanba governu promete atu fó sasán ho ho to’o $25, maibé folin sasan ne’e lato’o.

“Aktu ida ita bele analiza ba hanesan ne’e tanba dala ruma buat ne’ebé ke sira promete fó dala ruma ladún iha transparénsia ne’e halo ema la satisfás”, nia dehan.

Deputadu ne’e mos sujere governu bele kontinua programa sesta Bázika ne’e maibé presiza halo mudansa sistema distribuisaun, fahe osan $25 di’ak liu.

“Ami nia sujestaun mak ne’e se labele, produtu lokál la iha ona fó osan ba ema ne’e los ona, ha’u hanoin di’ak liu fó $25 dolar ne’e ba ema hodi nia ba hola buat ne’ebé nia hakarak ita bele dehan hanesan nee, tanba ita tenke ko’alia los ita atu fó produtu lokál maka ita fó fali importadu ba ema ne’e ita bosok ona, se nune’e ita tenke klarifika ba sira katak hakarak simu ka lae tanba produtu lokál la too”, nia sujere.

Maibé iha fatin hanesan Xefe Bankada Fretilín, Francisco Miranda Branco, hateten dalan di’ak liu mak governu fó de’it ai-han.

“Dalan diak liu maka governu fó de’it ai-han ba sidadaun sira tanba governu halo avaliasaun subsídiu sira hetan $200 programa Covid-19 ladún utiliza didi’ak hodi hola ai-han ne’ebé hola fali buat seluk, buat ne’ebé ke ladún esensiál, tanba ne’e tuir ha’u nia pontu devista fo ai-han di’ak liu,” Branco dehan.(Jornalista : Julio Salinas Soares)

No More Posts Available.

No more pages to load.