Deputadu FRETILIN: Sidadaun Indonézia Na’in-2 Pozetivu COVID-19 Tama Ilegamente husi Fatululik, Pasiente Ativu iha Sala Izolamentu Hamutuk Na’in-17

by -182 views
Imajen ne'e hatudu progressu no update kazu surtu COVID-19 ne'ebe rejistadu iha Komisaun Nasionál COVID-19.

Timor Post (26/01/2021)—Deputadu hosi Bankada FRETILIN, Alexanrinho Cardoso haktuir, sidadaun Indonézia na’in-2 ne’ebé deskonfia hetan ona moras daet COVID-19 tama ilegamente husi área Postu Administrativu Fatululik, Munisípiu Kovalima.

Tanba ne’e, reprejentante povu levanta kestaun ne’e iha plenária Parlamentu Nasionál hodi husu ba governu atu identifika lalais sidadaun hirak ne’e no husu atu aperta seguransa iha liña fronteira.

“Ha’u ba iha postu Fatululik fronteira besik liu Aldeia Fau iha informasaun hosi família sira katak iha sidadaun nain-rua ne’ebé mak halai hosi Atambua iha Aldeia Fau ho objetivu ida atu espalla (moras COVID) iha ita nia rai laran,” Deputadu Alexanrinho subliña.

Deputadu ne’e dehan, ema na’in-rua ne’e tama iha rai laran ho ilegalmente ho intensaun aat ba timoroan sira tanba durante COVID-19 hamate ema rihun ba rihun iha mundu, maibé iha Timor Leste seidauk iha ema ida maka mate tanba moras ne’e.

Deputadu ne’e husu governu atu tau atensaun maka’as iha fronteira tanba oras ne’e daudaun sidadaun sira iha sorin Atambua komesa hanoin aat ba Timor atu lori moras ida ne’e mai hadaet.

Iha fatin hanesan Deputada Maria Barreto husi Bankada CNRT, husu ba governu tenke tau atensaun ba fronteira liuliu Munisipiu Bobonaru, Kovalima no Oekusitanba iha Atambua, COVID sa’e maka’as.

“Ha’u nia observasaun iha Munisípiu Bobonaro laiha pos vizilánsia ne’ebé mai hosi ekipa konjuntu sira. Tanba ne’e husu governu atu bele tau konsiderasaun liuliu ba ministériu saúde oinsá atu bele tau pos vizilánsia ekipa protokolu saúde nian liuliu iha fatin prioridade hanesan fronteira entre Bobonaro ho Likisá no iha parte Nunura nia hodi bele ativa protokolu saúde nian iha ne’eba,” nia subliña.

Entretantu, Timor Leste atualmente rejista pasiente ativa moras daet COVID-19 na’in-17.

Tuir mai Progressu no update kazu surtu COVID-19 rejistadu iha Komisaun Nasionál COVID-19.

Jornalista Julio Salinas Soares

Editór Noémio Falcão

No More Posts Available.

No more pages to load.