Deputada FRETILIN Kestiona PNTL fo Seguransa ba Ema Riku Sira ho Karreta Luxu ba Pasiar

by -49 views

DILI—Reprezentante Povu iha uma fukun Parlamentu Nasionál (PN) kestiona Polisia Nasionál Timor-Leste (PNTL) seksaun tránzitu ne’ebé halo seguransa alias kawal ba ema risku nia- sira  sa’e karreta mewah ne’ebé sirkula husi diresaun Dili ba area Obratu-Manatutu.

Asuntu ne’e levanta husi Deputada Bankada FRETILIN, Maria Angelica Rangel, liuhusi plenária, segunda (01/02), hodi husu responsabilidade ba Ministru Interior-Vise Ministru Interior no Komandu Jerál PNTL kona-ba kestaun refere.

“Ami hakarak husu ba Ministru no Vise Ministru Interior ho Seguransa atu hare didi’ak se mak  atu fó eskolta ba. Tanba horisehik (domingu), kuandu ami fila husi foho, ami hetan karreta luxu barak ne’ebé mak ema riku nia-oan sira iha Timor forma iha Manatutu-Obratu nian, no ema sira ne’e karreta polisia nian mak kawal husi oin no kotuk. Kestaun ba ha’u mak ne’e, fatin ida Manatutu la’ós fatin ba karreta luxu sira halai ba, tanba fatin ne’e halo atu komunidade hothotu atu halo asesu ba, la’ós ba de’it ema riku nia oan”, Angelica deklara.

 Angelica dehan tanba sá ha’u dehan nune’e, tanba kuandu sira nia asesu liu, karreta sira ne’e polisia haruka sees hotu kedas, inklui Parlamentu Nasionál nia karreta plat mean. Sera-ké polisia labele halo distinguisuan ba karreta plat verde, azúl, mean. La’ós de’it tanba plat mean, maibé estrada ne’e atu halo asesu ba karreta públiku hothotu.

Angelica relata, karreta sira ne’ebé mak polisia tránzitu kawal ka fó seguransa mak hanesan Jagoar no Mercedes.

“Pergunta ba ha’u mak ne’e, sera-ké horisehik ne’e iha atividade halo komemorasaun ba loron boot ruma, mak ita nia riku boot sira nia oan Timor ne’e halo atividade automotive, tanba ne’e impede estrada ne’ebé mak komunidade atu halai ba. Ha’u kestiona tanba sá mak polisia ba tau serine hodi kawal karreta luxu sira ne’e”, kestiona deputadu Bankada FRETILIN.

Angelica hatete, tuir lei bainhira sirene lian signifika polisia fó seguransa ema boot ruma, hanesan Prezidente, Primeiru Ministru no Membru Governu, Prezidente Tribunal, Prezidente Parlamentu no Vise.

“Ami Deputadu sira kuandu halo fiskalizasaun ami la’o komboiu mós karreta la tuir ami ida. Hakarak hatene loloos tanba sá mak tenke kawal karreta luxu sira ne’e, tanba impede atividade ne’ebé ema atu la’o ba.  No Karreta luxu sira halo atividade ne’e selu taxa ba Estadu ka lae? Tanba sá tenke gasta mina ba kawal karreta luxu sira ne’e”, Angelica lamenta.

Angelica hatete, hanesan reprezentante Povu nia parte moe hare buat sira hanesan ne’e, tanba iha Timor ema barak mak sei ki’ak rabat rai, mais riku nia-oan sira halo konforme tuir sira nia hakarak.

Iha fatin hanesan, Xefe Bankada FRETILIN, Francisco Miranda Branco, sekunda katak nia parte la konkorda atu halo espozisaun luxu, alias kemewaan iha ema ki’ak barak nia leet.

“Halai ho karreta luxu iha rai ida ne’ebé ki’ak sei 43 ital porsentu iha liña pobreza nia okos. Ha’u hanesan reprezentante povu ida ki’ak, balu sei han loron ida dala-ida, ita halo espozisaun kemewaan iha kemiskinan nia leet”. Branco sekunda liuhusi plenária.

Hatán ba preokupasaun ne’e, Ministru Asuntu Parlamentár Komunikasaun Sosiál, Francisco Jerónimo, hatete nia parte rejista ona preokupasaun ne’e no promete sei relata hato’o ba parte kompetente.

“Relasiona ho seguransa, ha’u hanoin ami toma nota, ami sei haruka ba iha Senor Ministru ho Vise Ministru atu haree”, dehan Jerónimo.

Jornalista    : Jeremias Soares

Editor            : Mariano Martins