Debate EE-10: Deputada Olinda Dezafia F-FDTL – PNTL Hatohar Sidadaun Tama Sai Ilegál

by -102 views

Timor Post (27/01/2021)-Xefe Bankada KHUNTO, Olinda Guterres husu ba FALINTIL-Forsa Defeza Timor-Leste (F-FDTL) no Polisia Nasionál Timor-Leste (PNTL) destaka iha fronteira fó sansaun todan ba sidadaun kontra bandu hodi tama sai ilegál iha fronteira.

“Se mak kontra hodi nafatin tama mai Timor no sai ba iha Atambua Indonézia liu hosi dalan ilegál, husu ba seguransa sira ne’ebé iha fronteira labele tolera, kaer kona fó sansaun ne’ebé rigorozu, bele-bele labele tiru mate maibé tiru sira halo tohar de’it”, Olinda realsa iha plenária renovasaun estadu emerjénsia ba dala sanulu, iha parlamentu nasionál kuarta (27/01).

Nia husu pesoál seguransa iha fronteira no ministériu saúde atu servisu maka’as hodi prevene moras Covid-19 tama TL.

Entretantu Xefe Bankada CNRT, Duarte Nunes, agradese ba esforsu no sakrifísiu sira ne’ebé forsa no PNTL sira halo tanba sira nia serbisu mak povu hotu bele moris hakmatek.

“Liu hosi oportunidade ida ne’e bankada CNRT hato’o parabéns ba esforsu no sakrifísiu ne’ebé forsa sira halo atu hametin vijilánsia iha fronteira ne’e  tanba sira nia serbisu mak ita iha kotuk moris hakmatek ne’e”, Duarte apresia.

Maibé Duarte mós preokupa tanba forsa sira iha fronteira tanba sei menus atensaun liuliu iha fasilidade. Nia husu ba ministériu ne’ebé tutela ba forsa ho PNTL iha obrigasaun atu hatene saida mak forsa sira iha fronteira sei menus atu apoia.(Jornalista Julio Salinas Soares, Editor: Mariano Martins)

No More Posts Available.

No more pages to load.