Dalia: “Ha’u Nia Laen La’os Kriminozu”

husi -3,347 views
Kondisaun uma negosiante nu’u, Octoviano Lhan ne’ebé hetan baku husi Oknum PNTL tanba kontra regra Serka Sanitariu hodi halo transasaun negosiu iha loron Dominggu, (23/5/2021). (Foto TP/Orlando Oki)

(Reportájen Orlando Oqui)

DILI (Timor Post) – Espoza husi Vitima Octoviano Lhan, Dalia da Costa sente triste tebes ba hahalok oknum Polisia Nasional Timor-Leste (PNTL) ne’ebe halo agrasaun fizika ba ninia laen.

“Ha’u triste tebes. Tanba ha’u nia laen laos naokten ne’e mak baku hanesan ne’e”, haktuir Dalia ho oin tristi ba Timor Post iha ninia hela fatin Tasi-Tolu, segunda (24/05).

Espoza husi Vitima Octoviano Lhan, Dalia da Costa wainhira hatuduhela deve hodi sosa tiga roda ne’ebé selu seidauk hotu. (TP Orlando Oki)

Feto foun Oekusi ne’e hatutan, hahalok ne’ebe oknum polisia hatudu ne’e parte kompetente sira tenke halo investigasaun ne’ebe klean hodi hetan lialos.

“Ami nia moris mak fila liman ne’e. Tan ne’e ha’u husu tenke investiga tanba saida mak baku ha’u nia laen”, hatutan nia.

Asaun PNTL baku negosiante mane nain rua iha dalan João Paulo II nian ne’ebé sai viral iha sosial media ne’e, akontese iha Dominggu, (23/5/2021), maizu menus tuku 09:00 dader.

Octoviano Lhan tenki luta hasoru ekonomia Nasaun Timor-Leste ne’ebé fraku hodi halo sira nia moris kiak rabat rai. To’o tenki hetan baku husi PNTL tanba deit aihan bikan ida ba sira nia moris hodi kontra lei Serka Sanitariu. (Foto TP/Orlando Oki)

PNTL foti asaun hapara negosiu iha loron Dominggu tanba regra Serka Sanitariu nian bandu negosiante hotu-hotu atu labele halo transasaun negosiu nian iha loron Dominggu, Sabadu no Kinta. Governu autoriza negosiante sira sosa modo mai husi Likisa no Ermera iha deit loron Segunda, Kuarta no Sesta. Maibé negosiante sira obriga a’an maka hetan agreasaun fiziku ne’e.

Moris iha situasaun dilematis ba politika, ekonomia no pandemia iha Timor-Leste haterus liutan povu nia moris ne’ebé kiak sei kiak ba bei-beik hanesan kondisaun uma
Octoviano Lhan ne’ebé hetan baku husi oknum PNTL ne’e. (Foto TP/Orlando Oki)

Espoza husi Vitima Octoviano Lhan, Dalia da Costa esplika liutan, tiga roda ne’ebe sira uza hodi fa’an nuu ne’e kreditu hela no ninia folin seidauk selu hotu. “Ami nia tiga roda ne’e nia folin $1500, ne’e patraun ida husi Vikeke ninian maibe agora ami foin selu $425”, dehan tan Dalia.

Espoza husi Octo hatete, antes aplika serka sanitaria nia laen Octo fa’an nuu kada loron hetan $20 no $30 maibe iha situasaun agora arraska tebes.

Enkuantu, tuir observasaun Timor Post iha vitima Octo nia uma nota katak, Octo ho nia espoza Dalia hela iha uma baraka oan ida ne’ebe didin ho kalen haleu besik iha lagoa João Paulo II Tasi-Tolu. Uma ne’e ho medida 7×8, iha kuartu ida, hariis fatin, dapur no baranda ida.(Lee notísia kompletu iha jornál Timor Post)