CPN-CNRT Laiha Personalidade Jurídika, Xanana mak ba Hatan Keixa Alkatiri

by -369 views

Timor Post (27/01/2021)— Jurista senior timoroan Amu Júlio Crispin argumenta, CPN nu’udar órgaun ida iha partidu laran laiha personalidade jurídika atu ba hatan iha Ministériu Públika ka Tribunál. Tanba ne’e, nia hatete, desizaun Partidu CNRT ba Kayrala Xanana Gusmão ba hatan keixa husi Marí Bim Amude Alkatiri ne’e normal.

“CNRT mak iha personalidade jurídika atu hatan, kuandu Doutor Marí Alkatiri akuza institusionalmente,” Amu Crispin subliña iha nia intervensaun iha debate ne’ebé organiza husi Tve iha loron, Segunda (25/01/2021).

Nia hatutan, órgaun hotu iha partidu ida nia laran inklui CPN nia responsabilidade iha de’it partidu laran, ba liur, ne’e entidade ka pessoa koletivu ne’ebé maka iha personalidade jurídika.

Iha kazu ne’e, Kayrala Xanana Gusmão maka nu’udar Prezidente Partidu CNRT.  

“Maun Boot Kayrala Xanana Gusmão mak ba hatan, la’ós hanesan Prezidente Konsellu Polítiku Nasionál,” Amu Crispin hatutan.  

Debate ne’ebé partisipa mós husi jurista seluk inklui Manuél Tilman ho Avelino Coelho, kuaje fó opiniaun hanesan kona-ba líder nasionál na’in-rua husi partidu boot rua iha nasaun ne’e, hatudu sinál di’ak tebes ba sosiedade iha prosesu defende lia loos.

“Direitu Alkatiri nian bainhira nia sente ninia personalidade jurídika prezudikadu, hetan karik ameasa no violénsia ruma ou hetan karik intimidasaun ruma, kria prezuiju ba nia direitu personalidade, nia iha direitu atu hato’o keiza ba órgaun kompetente atu bele rejolve,” Amu Crispin subliña.

Maibé nia salienta, Alkatiri iha obrigasaun atu aprejenta faktus sira hodi nune’e Ministériu Públiku prova no kontinua nia prosesu ba tribunal.

Nia dehan, investigasaun maka sei prova katak iha duni faktus sira sufisiente hodi halo akujasaun ka la’e.

Entretantu Alkatiri keixa CPN-CNRT relasiona ho akujasaun sira kona-ba nia involvimentu iha asina Acordo Marítima (CMATS) entre Timor-Leste ho Austrália iha tinan 2002 hodi suspende diskusaun no negosiasaun hotu-hotu sobre disputa Fronteira Marítima durante tinan 50 nia laran no sibu subornu husi kompañia explorador ConocoPhilips.

Nune’e mós Alkatiri keixa Bankada CNRT liga ho kazu ne’ebé refere no kazu seluk inklui Skylight hodi oho Prezidente Nicolau Lobato.

Kona-ba Kazu Skylight, Alkatiri keixa ona mós sidadaun na’in-haat inklui José Luis Guterres, Rogerio Lobato, Abílio Araújo ho Guilhermina Lobo de Araújo. (cao)

No More Posts Available.

No more pages to load.