CPN-CNRT Deside Xanana Mak ba Hasoru Alkatiri iha Tribunál kona-ba Keixa Sira Rejistadu Inklui Kazu Oho Nicolau Lobato

by -8 views

Timor Post (23/01/2021)—Konsellu Polítika Nasionál (CPN sigla Portugués) liuhusi reuniaun extraordinária konkorda Prezidente Partidu Congreço Nacional da Reconstrução Timorense (CNRT), Kayrala Xanana Gusmão mak ba hasoru Sekretáriu Jerál FRETILIN, Marí Bim Amude Alkatiri iha Tribunál relasiona ho kazu hirak ne’ebé nia rejista ona iha Ministériu Públiku (MP).

Antes ne’e Alkatiri keixa CPN-CNRT relasiona ho akujasaun sira kona-ba nia involvimentu iha asina Acordo Marítima (CMATS) entre Timor-Leste ho Austrália iha tinan 2002 hodi suspende diskusaun no negosiasaun hotu-hotu sobre disputa Fronteira Marítima durante tinan 50 nia laran. Nune’e mós Alkatiri keixa Bankada CNRT liga ho kazu ne’ebé refere no kazu seluk inklui Skylight hodi oho Prezidente Nicolau Lobato.

Tanba ne’e, liuhusi Konferénsia ba Imprensa, Sábadu (23/01/2021), iha Sede Sentral iha Bairro dos Grilhos, Dili, Vise Prezidente CNRT, Virgílio Smith subliña, CPN-CNRT foti desizaun fó poder tomak ba Xanana tanba CNRT hanesan partidu ne’ebé responsavel máximu maka Prezidente Partidu.

“Iha partidu laran ami hotu hein, bainhira loos  mak Ministériu Públiku sei bolu membru CPN no deputadu bankada CNRT,” afirma Virgílio iha konferénsia imprensa ne’ebé akompaña husi Adjuntu Sekretáriu Jerál Jacinto Rigoberto ho Tomas Cabral.

Konferénsia imprensa ne’e hala’o hafoin reuniaun extraordinária iha Sede Sentrál ne’ebé partisipa direta husi Prezidente CNRT, Kayrala Xanana Gusmão.

Virgílio husu ba Ministériu Públiku atu komprende katak, CPN partidu CNRT, órgaun koletivu ida iha desizaun hotu-hotu.

Nia aumenta, bankada parlamentu CNRT, implementa politiku hosi partidu CNRT liu hosi programa sira ne’ebé hasai iha kongresu no mós implementa desisaun hosi órgaun másimu partidu nian.

Nia subliña, membru CPN sira seluk no deputadu 21 hosi bankada CNRT iha parlamentu nasional, sei partisipa mós iha prosesu julgamentu maibé uza sira nia direitu ba silensiu tuir artigu 60⁰, alinea C, kodigu prosesu penal.

Entretantu iha loron 18/01/2021, Alkatiri ba presta ona deklarasaun iha MP hodi konfirma tan keixa sira antes ne’e nia hatoo.

Maske nune’e, Alkatiri hatete, keixa hotu ne’ebé nia prosesa laiha ligasaun ho Prezidente CNRT Kayrala Xanana Gusmão. Maibé, ba Jornalista sira Alkatiri dehan, karik Xanana mak sei hasoru malu ho nia iha justisa, nia afirma katak, la tauk.

“Prezidente CNRT ha’u la hato’o keixa tanba nia la halo deklarasaun, maibé irmaun Xanana mak halo deklarasaun ruma sala ha’u hatama nia, ha’u la tauk ida,” Alkatiri afirma.

Jornalista Jaime Pires

Editor Noémio Falcão