COVID Polítiku iha Timor: CNRT Kontra Atake FRETILIN hasoru Xanana, “Tau Moru Haleu Rezidénsia Lecidere”

by -85 views

Timor Post (22/03/2021)—Deputadu Bankada CNRT iha uma fukun Parlamentu Nasionál kontra atake FRETILIN hasoru Kayrala Xanana Gusmão halo kampaña katak moras COVID-19 iha Timor Leste ne’e jogu polítiku.

Deputadu CNRT lamenta tebes ho akujasaun hasoru Prezidente CNRT, tanba tuir sira saida maka Xanana halo durante ne’e tún ba haree besik nia povu sira no ho kbiit tomak hala’o asaun kariedade i la’o haleu Timor hodi fó atensaun kona-ba impaktu husi moras daet ne’e.

Tanba ne’e, Deputadu CNRT, Marcos Xavier husu ba governu atu di’ak liu maka foku ba servisu no rejolve problema sósiu-ekonómiku ne’ebé nasaun infrenta durante ne’e.

“Maun Xanana nunka la’o tama sai ba komunidade sira dehan COVID-19 ne’e polítika, no nunka kontra regras serka sanitária,” Deputadu Marcos afirma iha plenária PN, Segunda (22/03/2021), hafoin rona deklarasaun deputadu Bankada FRETILIN, Francisco Miranda Branco katak, Xanana la’o tama sai komunidade dehan, COVID-19 polítiku de’it.

Deputadu Marcos hatete, Timor nu’udar nasaun soberanu iha servisu seguransa ne’ebé hala’o kna’ar tomak tuir lei. Tanba ne’e, saida maka Xanana halo ba interese nia povu no nasaun.

“Ita boot sira mak ukun, sé haree Xanana kontra regras no dehan COVID-19 ne’e polítika, tanba sá la haruka polísia ba kaer nia iha nia fatin, ka ha’u haree la brani hotu atu kaer nia (Xanana),” deputadu Marcos subliña.

Iha fatin hanesan Deputada CNRT Carmelita Caetano Moniz mós hatete, tuir nia haree Xanana nunka kontra regras serka sanitária no nunka dehan ba komunidade sira iha bairu-bairu katak COVID-19 ne’e polítika governu de’it.

“Xanana nunka kontra regras serka sanitária no nunka halo Press Conference ida dehan COVID-19 ne’e polítika, maibé Xanana ba fatin ne’ebé de’it ita nia populasaun sira mak gosta ba hobur no gosta hadau malu hasai foto ho nia,” Carmelita subliña.

Nia hatutan, ezemplu ida bainhira Xanana distribui hahán ka fó apoiu ba komunidade balun mak komunidade sira hotu-hotu mai hadau malu hasai foto ho nia ne’e atu duni ka oninsá.

“Se hanesan ne’e di’ak liu hapara de’it nia atividade se la’e tau tiha moru haleu tiha nia uma iha Lecidere ne’e para nia labele sai no labele ba halo buat hotu,” Carmelita hatete.

Jornalista Jaime Pires

Editór Noémio Falcão

No More Posts Available.

No more pages to load.