SIJK Rejista Kazu Foun 9 inklui 1 husi Lautem, Rekopera Na’in-4 no Ativu Hamutuk 211

husi -128 views

Timor Post (22/03/2021)—Sentru Integradu Jestaun Krize (SIJK) rejista ema na’in-ida afeta moras daet COVID-19 iha Aldeia Reisoru, Suku Home, Postu Administrativu Lospalos, Munisípiu Lautem.

Ema ne’e sai husi Dili ba Lautem iha loron 18/03/2021, husu lisensa husi SIJK rasik ho rajaun umanitária, maibé bainhira to’o iha Lautem ekipa saúde foti amostra lori mai análiza iha Laboratórium Nasionál deteta pozitiva.

Iha Dili estudante UNITAL ne’e hela iha Aldeia Bedois Suku Kamea.

Entretantu dadus COVID-19 ba loron ohin, fó sai husi Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Doutór Rui Maria de Araújo katak, iha kazu foun hamutuk na’in-sia inklui na’in-haat iha Dili, na’in-haat iha Vikeke no na’in-ida iha Lautem.

Ho nune’e, total kazu ativu ka pasiente COVID-19 ne’ebé baixa iha sala izolamentu Vera Kruz ho Tasi tolu hamutuk 211. (cao)