COVID-19: Serka Sanitária iha Bobonaro no Kovalima, Ajénsia Internasional Rua hato’o Preokupasaun ba PAM

husi -27 views

Timor Post (16/02/2021)— Prezidente Autoridade Munisípiu Bobonaro, Jeferino Soares dos Santos, hatete, seidauk simu diretiva husi governu sentral kona-ba serka sanitária ne’ebé Konsellu Ministru desidi ba Munisípiu Bobonaro ho Kovalima hahú iha loron Segunda (15/02/2021), oras 23:59.

“Buat ne’e foun mai ami. Serka sanitaria ne’e buat foun, mas ami seidauk hetan diretiva ruma atu ejekuta oinsá,” Administradór Jeferino subliña ba Timor Post via telefone.

Administrador dehan, nia hatene de’it maka desizaun governu nian labele dezloka tama sai ba munisípiu Bobonaro ho Kovalima.

Tanba ne’e, saida mak akontese, funsionáriu husi ajénsia internasional JICA ho TOMAK hato’o sira nia problema la hanesan ba Prezidente Autoridade Munisípiu (PAM) Bobonaro. Husi JICA (Japan International Cooperation Agency) iha ekipa ida ne’ebé sira antes governu foti desizaun iha ona Maliana no agora atu fila ladiak. No husi Ajensia TOMAK (Toos ba Moris Di’ak) husi Austrália iha ekipa ida konsege fila ona ba Dili maibé konforme ajenda atu ba fali Maliana iha semana hirak tuir mai bele kansela.

Administradór dehan, nia foin simu preokupasaun husi ajénsia rua ne’e, maibé tuir informasaun sei iha tan ekipa husi ajénsia internasional seluk ne’ebé hala’o hela misaun iha Bobonaro antes desizaun ba serka sanitária.

“Sira atu fila ladiak. Ajénsia internasional ne’e hotu-hotu iha Dili, nebe, ohin ha’u tenta konfirma tun-sa’e ho komandante PNTL iha ne’e tanba atu ejekuta regras ne’e parte seguransa,” Administrador hatete.

Nune’e, ba sira ne’ebé ba halo misaun antes de serka sanitária, sira autoriza sai fali husi munisípiu bazeia ba dokumentu ne’ebé bele prova katak ba hala’o duni asaun iha munisípiu laran.

“Maibé komunidade baibain mak atu halo movimentasaun, ne’e komandante PNTL iha ne’e dehan ita tenke hapara hodi hein diretiva ruma tún mai atu ita ejekuta oinsá,” Administradór subliña.

Iha parte seluk, Administradór Jeferino haktuir, atividade seluk hanesan servisu iha administrasaun públika no eskola sira la’o normal hela.

Administradór dehan, diretiva husi governu sentral importante tebes atu sira bele ejekuta tuir baze legal sira no sensebiliza ba populasaun hotu.

“Para, bainhira nia (sidadaun) tama hodibit karik sei hetan (sansaun) saida. Kuarentena ka oinsá, ida ne’e maka situasaun ne’ebé ami seidauk simu loloos,” Administradór preokupa.

Entretantu Governu liuhusi Konsellu Ministru Extraordinária taka total movimentu iha munisípiu Bobonaro no Kovalima tanba ema tama sai ilegal husi fronteira hodi provoka moras daet COVID-19 sa’e no posibilidade boot ba transmisaun lokal.

Serka sanitaria iha munisípiu rua ne’e atu evita mós virus foun SARS-Cov-2 ne’ebé hamate mós ema barak ona iha mundu.

Ministru Prezidensial Komsellu Ministru, Fidelis Leite Magalhães, haktuir ba Jornalista sira hafoin Konsellu Ministru foti desizaun iha Palásiu Governu, Segunda (15/02/2021), serka sanitária ne’e prazu to’o loron 3 Marsu.

Portavoz Governu ne’e dehan, movimentu ilegal perigu tebes ba nasaun.

Nia dehan, atu akautela saúde públika populasaun no impede akorrensia transmisaun komunitaria hosi SARS-CoV-2 iha territóriu nasionál.

Ho projetu rezolusaun ne’e hanesan intertida dezlokasaun sira entre munisípiu sira ne’e no munisípiu seluk.

Nia mós esplika, kona-ba atividade ekonomika inklui mós hanesan igreja iha munisipiu rua ne’e, miniateriu saúde no ministeriu edukasaun juventude no desportu mak sei enkontru hodi desise medida sira ne’ebé mak atu implementa iha munsipiu rua ne’e nia laran.

Maibé governu ohin deside ne’e, taka hodi labele halo viajen ba mai hosi munsipiu rua ne’e ba munisipiu seluk, inklui mós hosi munisipiu seluk ba munisipiu rua ne’e.

Entretantu tuir dadus, husi Sentru Integradu Jestaun Krize (SIJK) ne’ebé fó sai iha loron 15 fevereiru 2021, rejista pasiente COVID-19 ba agora dadauk baixa hela iha sala izolamentu hamutuk na’in-40 rekopera na’in-ida. Nune’e, Sura hamutuk pasiente sira ne’ebé rekopera ona hahú husi fulan Marsu 2020, Timor Leste rejista pasiente hamutuk 102.   (cao)