COVID-19: Professional Saúde Na’in-23 Tama Kuarentena Obrigatóriu

by -5 views

DILI—Porta-Vóz Sentru Integradu Jestaun Krize (SIJK), Doutór Rui Maria de Araújo informa, pessoal saúde na’in-23 maka obrigadu tama iha kuarentena obrigatóriu tanba durante ne’e atende pasiente sira pozitivu ba pesti corona (COVID-19).

“Husi sira hotu ne’ebé kuarentena, iha sira na’in 23 maka profesionais de saúde. I sira ne’e mai husi grupu ema ne’ebé durante ne’e fó asisténsia iha fatin kuarentena sira no mós iha fatin izolamentu iha Vera Kruz,” Doutór Rui informa ba Jornalista sira, Segunda (20/04/2020), iha Sala de Situasaun, Sentru Konvensaun Dili (CCD sigla Portugués).

Doutór Rui dehan, total ema iha kuarentena hamutuk 597. Husi númeru ne’e, na’in-15 maka auto kuarentena iha munisípiu, na’in-474 maka kuarentena iha fasilidade governu nian iha Dili, na’in-108 iha fasilidade governu nian iha munisípiu sira.

Entretantu Doutór Rui haktuir, husi total ema 597 iha kuarentena ne’e, na’in 327 mak suspeitu ba COVID-19. Husi númeru ne’e, na’in 22 mak pozitivu inklui na’in ida rekopera iha loron 10/04/2020, na’in 5 provavel, na’in-92 mak hein hela rejultadu husi laboratórium no na’in-208 maka teste laboratórium hatudu negativu.

Doutór Rui informa, atualmente pasiente pozitivu na’in-21 no na’in-5 ne’ebé rejista hanesan kazu provavel tama ona iha sala izolamentu Vera Kruz, Dili.

Antes ne’e Doutór Rui esplika, ema ne’ebé konsideradu ba kazu provavel ne’e katak seidauk hetan konfirmasaun husi laboratórium maske halo teste kleur ona. (cao)