COVID-19: Presidente Komisaun G Apresia Desizaun MEJD hapara Atividade Eskola

by -52 views

Timor Post (07/01/2021)-Prezidente Komisaun espesializada trata ba asuntu Edukasaun Juventude Kultura no Sidadania, deputadu Antonio Verdial, apresia desizaun no servisu Ministériu Edukasaun Juventude no Desportu (MEJD) nian durante períodu hapara provizóriu atividade eskola.

Deputadu membru bankada parlamentár Khunto ne’e salienta, ekipa ministériu edukasaun aproveita tempu badak ne’e hodi identifika eskola ne’ebé la iha kondisaun saneamentu atu hadi’a nune’e loke hikas atividade eskola, ne’ebé kumprimenta ba protokolu saúde nian.

“Agora daudaun, hatene katak MEJD iha ona ekipa ida konjuntu kompostu hosi edukasaun, saúde no autoridade sira hatene katak sira halo hela serbisu iha terenu no iha operasionál nia laran ba iha eskola sira. Iha tempu ida ke la naruk no badak tebes no atu hatete katak agradese tebes MEJD nia serbisu, tanba nia hola responsabilidade atu tau matan duni ba kondisaun eskola hotu iha territóriu laran tomak, hodi hala’o fali atividade hanesan baibain”, Verdial espresa, iha parlamentu nasionál Kinta (07/01).

Reprezentante povu ne’e reforsa atu ba autoridade eskola no estudante territóriu tomak kumpre ba regras estadu emerjénsia bainhira hahú hikas atividade eskola.

“Buat ida distansiamentu sosiál ne’e, fase liman ho bee no sabaun, tau máskara ida ne’e autoridade eskola sira tenke uza atu nune’e eskola sira bele la’o nafatin”, katak deputadu.

Entretantu oras ne’e daudaun atividade ensinu no inskrisaun eskola públiku no privada tinan letivu 2021 nian suspende hela hosi MEJD liuhosi desizaun nivel ministerial iha loron 4 Janeiru 2021.

Jornalista: Julio Salinas Soares

Editor: Mariano Martins

No More Posts Available.

No more pages to load.