COVID-19: Movimentu Ilegal iha Fronteira, PM Taur Taur bolu Urjente Brigadeiru Aluc

husi -496 views

Timor Post (16/02/2021)- Primeiru Ministru no Ministru Interior (PMMI), Taur Matan Ruak bolu urjente Diretór ezekutivu Sentru Integradu Jestaun Krize (SIJK), Brigadeiru Jenerál, João Miranda “Aluk” hodi husu kona-ba sidadaun sira ne’ebé tama ilegál ho pozitivu Covid-19.

“Primeiru Ministru bolu ami lalais hosi Sala se Situasaun atu hakarak hatene situasaun liu-liu iha fronteira”,  Aluk informa ba Jornalista sira iha Palasiu Governu, tersa (16/02).

Brigjen hatutan iha númeru boot ida tama mai ilegál iha loron Segunda (15/02), no entre sira ne’e iha elementu ida mak pozitivu ba Covid-19, no nia tama liu ba ona iha suku ida ho naran Hauba iha munisípiu Bobonaru nia depois liu loron ida mak konsege deteta.

Aluk adianta parte Ministériu Saúde halo ona teste ba nia família sira no ba ema sira ne’ebé mak akompaña nia iha karreta laran. Maibé,  maski halo teste ba nia família no ema sira ne’ebé mak la’o ho nia ne’e rezultadu negativu, maibé seidauk hotu tanba ema sira ne’ebé mak akompaña ne’e seidauk fó teste hotu.

Relasiona ho situasaun ne’e governu liuhosi Konsellu Ministru estraordináriu Segunda (15/02) deside taka total munisípiu Bobonaru no Kovalima hodi labele halo viajen ba mai munisípiu, iha tempu hanesan koloka membru seguransa iha fronteira entre munisípiu ne’ebé aplika konfinamentu (lockdown) hanesan  Bobonaru-Ermera.

“Ohin ko’alia kona-ba oinsá atu seguransa hodi halo seguransa ba fatin sira ne’ebé mak ema sira bele ultrapasa hodi hakat ba-mai –ba munisípiu seluk”, informa Aluk.

Hahú hosi Marsu 2020 to’o 14 Fevereiru 2021 númeru kumulativu kazu covid-19 ne’ebé iha TL ne’ebé fó sai hosi pájina Ministériu Saúde, konfirmandu 102, númeru kumulativu teste ema 20120, kumulativu rezultadu negativu 19870, hein rezultadu 184, númeru kazu baixa hela 40, númeru rekupera 66, mate 0.

Jornalista            : Jaime Pires

Editor                    : Mariano Martins